Assanami husu deputadu no governante sira nia konsensia prontu kua salariu hodi apoiu luta kontra Covid-19 ne’ebé estadu infrenta hela.

“Sebele ita nia salariu 50% kua par atu haree lalais sira ne’ebé moras iha ospital nomós doutór, médiku sira no polisia ne’ebé loro-loron halo servisu, saida mak la boot liu, ha’u hanoin naton 50%, iha Parlamentu Nasionál bele besik mill $90 no membru governu nian aumenta maske oituan, maibé bele fasilita nesesidade baziku ne’ebé sira presija,”dehan nia, iha Parlamentu Nasionál, kuarta (01/03).

Eis Ministru Agrikultur no Peskas ne’e, hanesan rekomendasaun ba membru deputadu sira no membru governu karik iha situasaun hanesan ne’e bele fó kontribuisaun ida. Relasionadu situasaun estadu emerjénsia ida-idak labele ba apoiu direta maibé liu husi dalan kua osan bele apoia sira.

Entretantu, Deputada Bankada KHUNTO, Olinda Guterres apoia ideia deputadu Mariano Assanami Sabino hodi kua salariu ba ema sira ne’ebé presija apoia urjente.

“Ha’u-nia hanoin mós Mariano ko’alia ne’e, ita nia funsionariu hanesan polisia sira agora iha risku, tanba ha’u hakarak husu karik osan la too lalais urjente foti deputadu sira nia osan fulan ida nian mós ha’u prontu,”dehan nia.