DILI:Presidente Camara Comersiu Industria Timor-Leste (CCI-TL), Oscar Lima husu Governu atu redus taxa importasaun aihan nian (nesesidade baziku) iha periodu estadu emerjénsia luta kontra viruscorona (Covid-19).

Emprejariu Timor-oan ne’ebé hamaha-an iha CCI-TL husu atu portu kontinua loke, redus birokrasia, no redus taxa ba importasaun aihan durante periodu emerjénsia, tanba situasaun afeita ba atividade negosiu rai laran.

“Ami ko’alia kona-ba importadór atu nunee hatama sasan mai labele iha difikuldade, sente prejudika ba birokrasia iha portu tanba atividade ekonomia tuun tebtebes,”dehan Presidente CCI-TL ne’e hafoin reuniaun ho Ministru Koordenador Asuntu Ekonomia Interinu Fidelis Leite Magalaês, iha salaun Gabinte Apoiu Sosiedade Sivil, Palasiu Governu,(31/03).

Presidente ne’e sujere atu portu Dili tenke loke atu sasan sira husi nasaun seluk bele tama no loja sira bele hatama nafatin aihan, tanba tuir nia katak estadu emerjénsia mak kontinua too fulan tolu bele provoka povu hamlaha.

Durante ne’e, taxa importasaun ba aihan pursentu 10 (10%), tanba ne’e CCI-TL sujere atu redus tan ou bele halakon temporariamente bainhira nesesaria iha periodu estadu emerjénsia.

“Buat ne’ebé ami hanoin hatoo ona oinsa bele haree kona ba taxa sei bele inzenta (halakon) tiha labele iha taxa, tanba ema paradu osan la lao, atividade laiha sei governu karega ho taxa defisil,”tenik nia.

Oscar Lima mós rekoñese katak situasaun atuál ne’ebé Timor-Leste infrenta dadaun laos responsabilidade ema ida nian (emprezariu no governu) maibé responsabilidade inkluzivamente kontribui atu kontra covid-19.