Luta kontra covid-19 nuudar responsabilidade sidadaun hotu nian, maibé oinsa ba povu sira ne’ebé kbiit laek, sira sente preokupadu tebes, hanesan saida mak Pedro Fernandes infrenta.

Pedro Fernandes, idade tinan 49, nuudar ambulante negosiu kiik ida iha kapital Dili. Nia lor-loron tenki dudu nia karosa (gerobak) hodi hili lata mamuk.

“Se estadu bandu ami la bele sai, ami atu han saida iha uma, ami tenke hili lata mamuk no besi aat sira depois fa’an hodi sosa hahán,”dehan, Pedro ba jornál INDEPENDENTE, iha Kaikoli, Tersa (31/03).

Nia dehan, ema sira ne’ebé servisu simu osan boot, bele sosa hahán fulan ida nian tau iha uma, maibé hanesan povu kiik labele, entaun tenke sai buka osan depois sosa nesesidade familia nian.

“Ami mós tauk moras, maibé nesesidade familia nian ami tenke sai, karik estadu bandu entaun fahe hahán mai ami atu bele tuur deit iha uma,”dehan nia.

Iha fatin ketak, Apolinario Ximenes (35), ne’ebé faan pulsa no sigaru iha largo lesidere hateten, nuudar povu bai-bain lor-loron tenke hamrik iha estrada fa’an pulsa no sigaru atu sustenta familia.

Loron ida hetan osan $10 too $20, maibé iha situasaun emerjénsia ne’e laiha movimentasaun entaun defisil atu hetan osan.

“Ami preokupa ho situasaun nee, ami labele hetan osan, bainhira dehan hapara tan movimentasaun oinsá ho ami nia moris,” dehan nia.

Nia dehan, parte Ministeriu Saúde esplika ona kona-ba prevensaun ba COVID-19 ne’e, maibé tanba nesesidade obriga hakarak ka lakohi tenke sai, lae bele mate tan hamlaha, laós tan moras ne’e. Hanesan povu husu ba governante sira atu tetu didiak situasaun ne’e, atu nunee povu labele sai vitima ba covid-19 no vitima tan ba desizaun governu nian.