HAK husu investiga pesoal PSIK husu osan seguransa ba familia fujitivu Arnolfo Teves Jr Featured

By Cristina Ximenes Abril 09, 2024 191
Diretór Asosiasaun HAK, Feliciano da Costa Araújo. Foto:Google. Diretór Asosiasaun HAK, Feliciano da Costa Araújo. Foto:Google.

DILI: Asosiasaun HAK preokupa ho aktu husi pesoal Polisia Sientifiku Investigasaun Kriminal ne’ebé husu osan seguransa ba familia fujitivu Arnolfo Teves Jr. Tuir HAK aktu husi pesoal ne’e hafoer kredibilidade instituisaun.

Diretór Asosiasaun HAK, Feliciano da Costa Araújo lamenta ho aktu husi pesoal PSIK ne’ebé husu osan seguransa ba familia fujitivu Teves.

Feliciano sujere ba PSIK atu loke prosesu investigasaun ba pesoal refere tanba pesoal ne’e hafoer PSIK nia kredibilidade.

“Autoridade PSIK rasik atu bele investiga ba oknum ida ne’ebé komete ho aktu refere, signifika nia vióla ona kredibilidade instituisaun ne’ebé ema estabelese tanba ema tau konfiansa,” dehan Diretór HAK ne’e, Segunda (08/04).

Tuir nia, PSIK ninia kna’ar boot mak oinsa haree kona-ba money laundry, tráfiku umanu no teroriszmu.

Maibé, bainhira pesoal PSIK mak komete aktu husu osan ne’e hafoer PSIK ninia naran.

“Presiza atu investiga depois públika ba iha sosiadade atu bele hatene ida ne’e. Tanba ema hotu hatene katak iha kazu lubuk ida ne’ebé to’o agora seidauk públika ba iha públiku.”

Nia fó ezemplu, kazu Koordenadór PSIK nia oan útiliza pistola, membru PSIK ameasa ema iha festa no seluk tan.

“Atetude sira ne’ebé la di’ak ne’e presiza atu deklara ba iha públiku kona-ba ninia prosesu ne’e to’o iha ne’ebé ona.”

“Ami konsidera PSIK ne’e instituisaun ida ne’ebé estabelese ho ninia kredibilidade ne’ebé boot maibé se oknum sira hatudu ninia atetude la serve hanesan servidór estadu iha instituisaun refere, ha’u hanoin di’ak liu husu atu bele para husi instituisaun ne’e,” katak nia.

Iha fatin ketak, Diretór Ezekutivu Luta Hamutuk, José Alves da Costa lamenta mós ho aktu pesoal PSIK ne’e.

“Pesoal ida iha instituisaun públiku ida laiha direitu atu husu osan husi familia see de’it mak buka salva nia an iha ne’e bainhira halo krime iha nia nasaun rasik,” dehan José ba jornalista sira iha nia kna’ar fatin, Faról, Segunda (08/04).

Molok ne’e, pesoal Polisia Sientifika Investigasaun Kriminal husu osan ho valor rihun $2 ba fujitivu Arnolfo Teves Jr nia familia. Pesoal PSIK ne’e deklara ho osan refere sei fó ba guarda prizaun hodi garante seguransa 100% ba Teves.

Tuir dokumentu ne’ebé  INDEPENDENTE asesu, pesoal PSIK haruka mensajen ba Teves nia oan mane hodi informa kona-ba situasaun husi nia aman ne’ebé daudauk ne’e iha hela prizaun laran.

Iha mensajen ne’ebé pesoal PSIK haruka ba Teves nia oan mane, pesoal PSIK ne’e hatete katak nia foin ba vizita Teves iha prizaun ho objetivu atu haree ninia kondisaun seguransa.

Pesoal ne’e dehan, nia haree katak Teves nia seguransa ne’e garantidu, no husi PSIK sei kontinua ba vizita hodi haree, tan ne’e nia husu Teves nia oan mane atu apoiu osan $2.000 ba nia.

Osan ne’e, pesoal PSIK ne’e dehan, nia sei uza hodi sosa buat ruma ba guarda prizioneiru sira.

Hafoin haruka mensajen, Teves nia oan mane telefone direita ba pesoal PSIK hodi bele hetan esplikasaun di’ak liu tan.

Iha konversasaun refere, pesoal PSIK ne’e esplika katak osan refere atu bele garante seguransa ne’ebé di’ak liu ba Teves.

Pesoal PSIK ne’e hatete, guarda prizioneiru sira la husu maibé se posivel bele fó osan ba sira atu garante seguransa 100% ba Teves.

“Sira la husu ba ha’u atu … maibé ha’u hanoin se posivel ita fó osan ba sira atu sira bele garante seguransa 100% ba ita-boot nia aman,” pesoal PSIK ne’e hahú esplika nia intensaun.

Pesoal ne’e hatutan, iha tempu kotuk nia koalia ho Diretór Nasionál Prizaun no Diretór ne’e orienta nia membru na’in tolu ka haat hodi fó seguransa privadu ba Teves.

Rate this item
(0 votes)

Independente Digital TV