Rogeiro: Investidór hakarak loke Fabrika Hena iha RAEOA, sei fó servisu ba Timor-oan rihun Lima Featured

By Mariano Mendonca Abril 09, 2024 188
Prezidente Autoridade RAEOA, Rogerio Tiago Lobato. Foto: Media GPM. Prezidente Autoridade RAEOA, Rogerio Tiago Lobato. Foto: Media GPM.

DILI: Investidór sira hatudu sira-nia interese atu halo investimentu iha Rejiaun Administrativu Espesial Oekusse-Ambeno. Ho investimentu ne’ebé sei halo ne’e sei oferese kampu servisu ba Timor-oan rihun ba rihun.

Prezidente Autoridade RAEOA, Rogerio Tiago Lobato informa, iha investidór barak mak hatudu sira-nia interese atu halo investimentu iha RAEOA.

Nia fó ezemplu, investidór ida hakarak loke fabrika hena ne’ebé tuir kalkulasaun sei fó servisu ba Timor-oan na’in rihun lima (5.000). Investimentu ne’e ho valor besik millaun $20.

"Ha'u ko'alia mós ho Primeiru Ministru sobre investimentu balun ke Investidor hotu-hotu, balun hakarak halo ona iha Oekusse, hakarak loke Fabrika Hena atu emprega ema rihun lima," dehan Rogerio hafoin hasoru Primeiru Ministru, Kay Rala Xanana Gusmão, iha Palásiu Governu, Segunda (08/04).

Aleinde ne’e, nia dehan, iha mós investidór seluk ne’ebé hakarak investe millaun $70 iha area otelariu.

“Iha mós kompañia ida hakarak investe ona $70 miloens de dollares iha otelariu. Sira hakarak asina kontratu tau kedas osan iha Timor par hatudu katak sira iha boa vontade no sira atua ho boa fé, la'os hanesan investidor barak uluk mai iha ne'e dehan hanesan ne'e, hanesan ne’ebá, hakarak tau osan barak maibé nu fim la tau osan buat ida.”

Autoridade RAEOA, nia dehan, daudauk ne’e hakarak atu bainhira halo kontratu ba investimentu sei fó prazu fulan lima ba investidór atu tenke komesa investimentu no tenke depozita osan iha banku Timor nian.

“Hatudu osan hira mak sira hakarak investe tenke tau osan iha Timor," nia dehan.

Tanba, tuir nia, investidor ida labele ko'alia ibun boot de'it maibé tenke hatudu duni ninia vontade.

Problema aviaun ZEEMS

Prezidente Autoridade Rejiaun Administrativa Espesial Oekusse-Ambeno (RAEOA), Rogerio Tiago Lobato iha ninia reuniaun ho PM Xanana informa mós kona-ba problema aviaun Zona Espesial ba Ekonomia Sosial Merkadu (ZEESM).

Rogero dehan, Pilotu no enjeneiru husi Kanada hamoos númeru rejistu iha aviaun nia lolon.

"Ema sira ne'ebé husi Kanada, Pilotu ho enjeneiru sira ba apaga tiha rejistu Aviaun nian iha Aviaun nia lolon, ne'e buat ida ke sira labele halo, tanba aviaun ne'e patrimóniu Estadu Timor-Leste," dehan Rogerio.

Tuir nia, asaun hamoos númeru rejistu aviaun DHV-6 Twin Otter ne’e ilegal no bele konsidera krime.

Laiha resibu

Aleinde problema refere, nia hatutan, problema seluk mak kona-ba resibu ba aviaun ne’ebé sosa ho folin millaun $7 resin.

"Ha'u esplika mós ba Primeiru Ministru kona-ba despezas boot ne'ebé ita fulan-fulan tenke selu par ema sira husi Kanada atu kaer aviaun ida ke ita nian, maibé problema boot ida mak ne'e, ita sosa aviaun ne'e ita gasta $7 milioens dolares, to'o agora ita seidauk hetan kuitansi (resibu)," nia dehan.

Tanba laiha resibu, Rogerio dehan, durante tinan 10 ne’e aviaun ne’e see nian loos?

“Loloos aviaun na'in mak kaer tanba sosa tiha ona maibé to'o agora kuitansia ne'e buka la hetan, entaun ida ne'e iha irregularidade ida ne'ebé ke loloos tenke propoin bá governu,” dehan nia.

Rate this item
(0 votes)

Independente Digital TV