Atualizasaun progressu diskusaun tékniku ne’e bazeia bá identifikasaun no diskusaun inísiu bainhira Prezidente Repúblika (PR), José Ramos-Horta hala’o vizita bá Brunei Darussalam iha fulan Novembru tinan 2023.
Setór importante tolu ne’ebé iha ona nível diskusaun tékniku atu avansa bá kooperasaun mak hanesan setór saúde, mina no gás inklui edukasaun.
“Diskusaun nível tékniku entre Brunei Darussalam ho Timor-Leste la’o hela kona-bá saida mak Timor-Leste presiza iha kooperasaun ida-ne’e. Maibé, iha kontekstu relasaun bilaterál, relasaun entre nasaun rua la’o di’ak tebes liu-liu relasaun entre ami-nia Liurai ho Primeiru Ministru Kay Rala Xanana Gusmão,” dehan Wan Hadfi Latif iha Palasiu Governu, Segunda (08/04).
Diplomata ne’e kontente tanba Primeiru-Ministru Xanana Gusmão iha vontade boot no promete sei koordena ho ministériu relevante sira hodi ko’alia kona-bá konteúdu diskusaun ida-ne’e ba oin.
Tan ne'e, husi parte Brunei Darussalam nian hein ekipa tékniku Timor-Leste nian liu-liu sira ne’ebé sei bá Brunei hodi ko’alia ho kle’an liután.
Enkuantu, ligadu ho rekrutamentu bá traballadór Timor-oan sira hodi bá serbisu iha rai-li’ur, reprezentante Brunei iha Timor-Leste ne’e konfirma katak, diskusaun la’o tiha ona entre Embaixada Timor-Leste iha Brunei no ajénsia sira, prossesu ba oin sei hein informasaun detallada molok realiza rekrutamentu.