Diretór Asosiasaun HAK, Sisto dos Santos kongratula Primeiru Ministru Taur Matan Ruak nia afirmasaun kona-ba ninia pozisaun kontra ba Lei Pensaun Vitalisia (LPV).

Tanba, tuir Sisto, molok forma Partidu Libertasaun Popular (PLP), Taur Matan Ruak deklara ona ninia pozisaun kontra.

"Ami hatene hela katak saida mak ami halo aprosimasaun ho partidu sira, ema ida ne'ebé mantein pensaun vitalisia ne'e Fretilin, ami iha komunikasaun internál ho partidu sira hotu. Agora ema ida ne'ebé kumu metin lei pensaun vitalisia ne'e Fretilin, Asosiasaun HAK kritika hela partidu boot sira ne'ebé espiritu ba libertasaun povu ida ne'e, sira kontra prinsipiu ida ne'e," dehan Sisto ba jornalista sira iha nia kna'ar fatin, Faról, Sesta (02/12).

Tan ne’e, nia dehan, HAK kestiona partidu Fretilin tanba halo traisaun ba prinsipiu libertasaun povu.

“Partidu boot sira, partidu Fretilin, ne'ebé agora nia ema sira iha Parlamentu Nasionál ne'e mantein nafatin pensaun vitalisia ne'e trai prinsipiu libertasaun povu.”

"Ami kongratula ba partidu ida ne'e agora nafatin firme (kontra LPV) liu-liu PLP. CNRT nia pozisaun seidauk hatudu, PD nia pozisaun mós seidauk hatudu, ne'ebé Asosiasaun HAK dudu hela sira, insiste hela PD nia pozisaun ba pensaun vitalisia, ne'ebé ami hatene katak membru balun iha PD mós la konkorda ho pensaun vitalisia,” dehan nia.

Esperansa ba Revizaun

Rezistênsia Nasionál dos Estudantes de Timor-Leste (RENETIL) iha esperansa ba Parlamentu Nasionál ne’ebé lidera husi Aniceto Longuinhos Guterres Lopes atu bele halo revizaun ba Lei Pensaun Vitalisia.

Prezidente Konsellu Sentrál RENETIL, Carlos da Silva Lopes “Saky” hatete, RENETIL apresia Parlamentu Nasionál kansela sosá karreta 30 ba Deputadu sira.

"Ita apresia Parlamentu Nasionál iha Prezidensia kompaneiru Aniceto Guterres nia okos, kansela ona atu sosá karreta ba Deputadu idaidak, ba ida ne'e merese ba ita hotu nia apresiasaun. Espera Parlamentu Nasionál mós sebele halo revizaun ba lei pensaun vitalisia, tanba ida ne'e mós sai preokupasaun públiku nian," dehan nia, iha Sentru Konvensaun Dili, Sesta (02/12).