Ministru Prezidensiá Konsellu Ministru (MPKM) interinu no Ministru Finansas, Rui Agostu Gomes informa, alterasaun ne'ebé aprova refere ba funsionariu sira ajente administrasaun públiku, kontratadu administrasaun provimentu no traballador ba administrasaun públika kontratadu termu sertu ho salariu ne'ebé ki'ik.
Nia dehan, governu prevee orsamentu ba gaji 13 ne’e kuaze millaun $16.
"Maibé ida ne'e depende ba Prezidente Repúblika nia promulgaaaun, ita seidauk bele hatene," dehan nia hafoin reuniaun Konsellu Ministru iha Palásiu Governu, Sesta (02/12).
Tuir komunikadu ne’ebé jornal INDEPENDENTE asesu hatete, ho alterasaun ne’ebé KM halo, funsionariu kontratadu sira ho salariu liu $500 sei la simu gaji 13.
“Ho alterasaun ne’ebé aprova agora sei iha diretu ba pagamentu ne’ebé refere funsionáriu sira no ajente administrasaun públika (ho kontratu administrasaun provimentu) no mós traballadór ba Administrasaun Públika kontratadu termu sertu ho saláriu ne’ebé ki’ik husi dolar amerikanu $500 no ne’ebé la presta atividade profisionál iha gabinete ministeriál sira,”
Entretantu, tuir informasaun husi fontes parte governu nian katak, iha 9 Novembru 2021 KM aprova ona dekretu lei ba pagamentu extra-ordinaria. Iha dekretu lei inisiu ne’ebé KM aprova ne’e so funsionariu kontratadu estranjeiru mak laiha direitu ba pagamentu gaji 13.
Iha dekretu lei inisiu ne’ebé KM aprova, fonte ne’e dehan, pagamentu estraordináriu husi saláriu adisionál fulan ida nian sei fó ba funsionáriu, ajente kontratadu sira Administrasaun Públika nian, ba titulár kargu públiku, membru F-FDTL, PNTL, no Sistema Nasionál Intelijente no ba eis titulár no eis-membru órgaun soberania sira.
Maibé, nia hatutan, bainhira lori ba Prezidensia Repúblika, husi parte Gabinete Prezidensia Repúblika husu atu hasai trabaladór sira ho kontratu termu sertu.
“Nunee iha Sesta liu ba KM reune fali. Iha reuniaun ne’e, Ministru Finansas rasik mak defende katak pelumenus traballadór sira ho rendimentu ki'ik liu $500 simu nafatin. Ida nee mós la hatene se Prezidente Repúblika sei promulga ka lae,” dehan nia.
