Komandante Jeral Polisia Nasionál Timor-Leste, Komisariu Polisia Faustino da Costa hatete, Komando PNTL bandu membru PNTL hotu-hotu atu simu subsidiu $200 ba tinan nia rohan tanba sira-nia rendimentu $600 ba leten.
Komisariu ne’e hatete, dekretu governu nian hatete klaru ona katak subsidiu tinan nia rohan ne’e ba familia ne’ebé nia membru familia ho rendimentu la liu $500.
Tan ne’e, nia afirma, membru PNTL hotu-hotu sei la simu tanba sira-nia rendimentu kada fulan liu $500.
"Ami-nia membru ajente polisia sira de’it kuaze hetan rendimentu mensal iha fulan ida nia laran mais de $600," dehan Komisariu Faustino ba jornalista sira iha Komando Jeral PNT, Kaikoli, Kinta (01/12).
Tan ne’e, nia dehan, Komando Jeral sei orienta membru PNTL hotu-hotu atu evita simu subsídiu $200.
"Ami PNTL ne'e kuaze membru PNTL hotu hetan redimentu mensal ho montante 600, husi ajente sira to’o iha ami hetan salariu liu husi $500, tanba ne'e membru hotu-hotu presiza hatene no iha tempu badak ha’u sei fó sai," katak nia.
Iha parte seluk, Xefe Estadu Maiór Jeneral Falintil-Forsa Defesa Timor-Leste (F-FDTL), Tanente Jenerál Domingos Raul ‘Falur Rate Laek’ hatene, membru F-FDTL ne’ebé simu salariu kiik iha mós direitu atu asesu ba subsidiu $200.
“Ida ne’e depende ba governu nia desizaun, dehan membru sira ida salariu kiik dehan simu, sira bele simu, tanba ne’e lei mak regula, osan ne’e laos hanesan robisadu par fahe de’it, tanba ne’e depende ba lei no desizaun governu,” katak nia
KAK sei Observa
Adjuntu Komisariu Komisaun Anti Korrupsaun, Luis Oliveira Sampaio informa, ekipa husi KAK sei tuun ba terenu hodi haree preparasaun autoridade lokál sira ba implementasaun subsidiu $200.
"Ami halo hela koordenasaun tuun ba suku sira iha Dili laran, dezde semana ida ne'e, atu haree sira-nia preparasaun, tanba ami identifika ona iha fatin problema komplesu, sériu, kona-ba dadus uma-kain ne'ebé konsellu Ministru Aprova , dadus tuan 2020 nian ne'ebé kontinua lori mai to'o agora," dehan nia ba jornalista sira hafoin sensibilizasaun lei iha sede Partidu Demokratiku, Kolmera, Sesta (02/12).
Tuir dekretu lei ne’ebé fó sai, nia dehan, familia ne’ebé nia membru ho rendimentu liu $500 la simu subsidiu.
"Tuir loloos dadus ne'e mak tenke refleta ba ida ne'e, maibé dadus ne'e universál nian, ne'ebé ami halo ona koordenasaun, ami mós ko'alia ho MAE, suku, MSSI atu haree,” dehan nia.
Entretantu, tuir orariu husi BNCTL, iha 6 Dezembru, ohin, prosesu pagamentu subsidiu $200 hahú iha kapital Dili.
