Kestaun ne’e Xefe Governu relata  ona ba Prezidente Repúblika (PR), Francisco Guterres Lu Olo.

“Tuir lei orsamentál, loron 15 fulan Outubru orsamentu hirak ne’e tama ona ba  Parlamentu Nasionál (PN), atu halo diskusaun. Tanba ne’e, membru governu sira tenke hahú ona halo servisu, atu nune’e bele kumpre regra ne’ebé estabelese ona”, hateten Taur iha Palasiu Prezidensiál, Bairru-Pité, hafoin hasoru malu ho Xefe Estadu Lu Olo horisehik.

Durante preparasaun, Xefe Governu hamutuk ho membru sira sei haree OJE 2020,  ne’ebé naturalmente oinsá mak atu aumenta osan iha setór produtivu sira hanesan, edukasaun, saúde, agrikultura, hanesan mós buat ne’ebé sosiedade preokupa.

Tanba ne’e, governu sei halo ezersísiu, bainhira orsamentu ne’e konsolidadu ona, públiku bele haree.

Kona-bá membru governu ne’ebé seidauk kompletu, PM hateten, asuntu ne’e la’ós depende de’it boa vontade Xefe Governu, maibé naturalmente diskute ho Xefe Estadu maski lori ona tinan no seidauk iha solusaun.

Iha sorin seluk, Organizasaun Naun Governamentál (ONG) Luta Hamutuk konsidera governu halo ezekusaun OJE tinan 2019 ne’ebé  foin atinje 30%, kauza husi   estrutura ne’ebé seidauk kompletu.

“Ita haree  iha  relatóriu ezekusaun OJE 2019, ministériu balun foin  atinje 10% no 23%. Ida  nee kauza husi estrutura governu ne’ebé seidauk kompletu”, hateten Diretór Luta Hamutuk José Alves  iha knaar fatin Faról Kuarta (23/5).

José hatutan, tuir loloos ezekusaun OJE tinan fiskál 2019, iha trimestre dahuluk  tenke atinje ona  50%, maibé ida ne’e foin  atinje 30%.

Ida ne’e Luta Hamutuk konsidera katak, governu nia frakeza, tanba laiha planu integradu.

Atu rezolve kestaun ida ne’e, Luta Hamutuk sujere ba governu tenke halo aproximasaun di'ak  ho Prezidente Repúblika  hodi bele hetan solusaun ne’ebé di'ak, liuliu kompleta membru governu.

Nune’e mós peskizadór  La’o Hamutuk  Celestino Gusmão hateten, ezekusaun OJE 2019 foin atinje 30% konsidera laiha problema tanba ezekusaun foin  hahú  iha  meadu fulan Fevereiru.

La’o Hamutuk husu de’it ba governu tenke halo ezekusaun ho transparénsia, nune’e bele  garantia sustentabilidade povu.