Ida ne’e uluk. Ema dehan ohin la hanesan horseik. Karik loos. Ida ne’e mak hatudu iha ambitu foho Golgota iha tempu viasakra, Sesta (14/04).

Tuir joven balun, iha tempu hirak kotuk ema balun gosta provoka malu no ikus mai kria problema iha eventu boot sira. Maibé iha tinan ne’e, la akontese.

Joven Aldeia Gologota-Komoro, António Sousa hatete, kada tinan, liliu iha loron boot sempre akontese konflitu iha area Golgota.

Nia hatete, joven sira husi Tasi-Tolu no Kampung Baru sempre provoka malu no ikus mai hamosu konflitu.

“Iha ne’e kada tinan sempre iha konfrontus maibé grasas a Deus, ita-nia joven sira ohin loron kontribui ona ba paz no laiha problema ida mak mosu tan,” dehan António hafoin partisipa iha viaskara iha Golgota-Komoro.

Iha fatin hanesan Komunidade seluk, Maria Helena hatete, kada tinan nia sempre halo viasakra iha area ne’e maske dala-barak mosu problema.

“Ha’u gosta viasakra iha fatin ne’e tanba ninia natureja ne’ebé fresku no ema barak mak mai entaun halo la sente kolen,” katak nia.

Nia apresia ba nia maluk joven sira ne’ebé iha tinan ne’e fó sira-nia kontribuisaun ba pas, liliu durante viasakra.

Entretantu, Padre Parokia Dom Bosco Elias de Jesus espresa ninia sentiment kontente ba sarani sira, liliu joven sira ne’ebé la komete ona ba violensia.

“Ha’u-nia sarani sira iha parokia ne’e agora hakribi ona violensia tanba sira hatene ida ne’e la’os parte ba pas nian,” dehan Amu Elias.

Nia dehan, Igreja sei nafatin motiva joven sira liu husi Maromak nia liafuan atu nune’e joven sira bele iha hanoin ne’ebé pozitivu ba sira nia futuru, tanba sira mak nasaun ne’e nia fini ba abanbairua nian.