“Ita tenke husik kultura sadik malu ninian, hodi hakat ba diálogu. Husik kultura violénsia ninian hodi hakat ba dame, tanba ne’e mak ita bele halo diferensa ruma ba ita nia moris, ba família, komunidade, no iha servisu fatin”, dehan Bispu Dioseze Dili, Don Virgílio do Carmo da Silva, iha Santa Misa Páskua, iha Igreja Balidi, horisehik.
Bispu hatutan, mudansa tenke hahú husi aan rasik, la’ós atu hatudu ba ema seluk, maibe ida-idak tenke haree ba-aan. Tanba husi selebrasaun Páskua ne’e ninia finalidade atu konfirma katak Maromak hadomi ema. Hakarak renova ema. Ida ne’e mak novidade ne’ebé aas liu mai hodi fó esperansa mai ema.
Tanba ne’e, sarani sira hotu tenke tau iha neon Jesus nia mensajen sira. Keta ta'uk loke aan atu Jesus tama iha laran.
Páskua ne’e kompromisu atu aseita Maromak iha sirkunstánsia, situasaun no momentu saida de’it atu simu Maromak nia vontade. Tanba Jesus lori ona nia vida halakon ona buat ne’ebé aat, tanba ne’e tenke kompromete buat ne’ebé ema koko iha nia fiar durante semana santa nia laran.
Jesus dezeju nia aan mai ema buat ne'ebé atu halo mak loke odamatan no janela fuan nian atu simu naroman boot ne’ebé halakon nakukun.
