Vise-Primeira Ministra no Ministra Solidariedade Sosiál no Inkluzaun, Armanda Berta dos Santos hateten, MSSI iha ninia planu estratéjia nasionál tinan 2021-2025, ne’ebé inklui ona vizaun ida atu profesionaliza forsa servisu sosiál ne’ebé kualifikadu no mós internasionalmente hodi atinji metas ne’ebé governu hatuur ona, liu husi vizaun ba estabelesementu institutu impaktu sosiál hodi dezenvolve no profesionaliza forsa servisu sosiál iha Timor-Leste.
Nia dehan, vizaun ida ne’e bo’ot no presiza esforsu ho komprimisiu husi nivel tékniku to’o politika ne’ebé rigorozu.
“Forsa servisu ne’ebé kualifikadu sei asegura sistema bein-estar sosiál ne’ebé kualidade no atinji metas bein-estar sosiál liu husi rezultadu mudansa sosiál positivu ne’ebé sustentavél iha povu nia moris, hakbi’it povu nia resiliénsia hodi moris iha dignu, goza ninia independénsia no justisa sosiál," dehan nia ISAT Kampus Hudi Laran, sesta (10/02).
Ho nune’e, Governante ne’e Kongratula formadór MSSI nian ba formasaun profesionál Servisu Nain Sosial (SNS) ne’ebé dedika sira nia tempu hodi aprende durante tinan ida nia laran hamutuk ho ISAT ho ninia parseirus iha Australia.
“Forsa traballu ida ne’e, sei asegura governu hodi atinji nia vizaun ba hametin seguransa sosiál ba sidadaun Timor-Leste hotu-hotu, hamenus kiak no halakon hamlaha, garante protesaun sosiál no justisa sosiál ba ema sira ne’ebé iha situasaun vulneravel,”tenik nia.
Tan ne’e, Vise-PM mós hato’o ninia apresiasaun ba parseirus dezenvolvimentu sira ne’ebé durante ne’e servisu hamutuk ho MSSI iha área servisu sosiál nian, inklui dezenvolve no profesionaliza servisu sosiál.
"Husu nafatin atu servisu hamutuk ho MSSI hodi haree bein-estar sosiál ba povu Timor-Leste," katak nia.
Nune’e mós, Ministra ne’e husu ba formadór profisionál SNS sira atu fó prestasaun servisu ne’ebé di’ak hodi kontinua kapasita-an nune’e bele halo melloramentu servisu ba ema vulneravel sira iha Timor-Leste.
"Tanba ita hatene problema sosiál barak tebes iha Timor-Leste, ohin ita resolve ida, aban sei mosu fali problema seluk ida,”nia dehan.
Iha fatin hanesan, Reprezentante UNICEF iha TL, Bilal Durani, hatete, Servisu Na’in Sosiál importante ba governu hodi bele fó asisténsia ba ema ne’ebé vulneravél.
Tan ne’e, ba UNICEF rasik hakarak asegura labarik sira ne’ebé sai vítima violénsia niglijénsia esplorasaun.
"Ami nia prioridade mak atu servisu hamutuk ho MSSI atu prevene labarik sira labele sai vítima ba abusu hirak ne’e no ajuda sira atu bele hetan servisu ne’ebé apropriadu,”dehan Reprezentante UNICEF.
Nia esplika, atu labarik sira hetan servisu ne’ebé apropriadu presiza SNS ne’ebé kualifikadu, tanba ne’e sira hakarak servisu hamutuk ho MSSI hodi haree rekursu humanus ne’ebé treinadu no kualifikadu duni hodi bele fó apoiu ba labarik sira.
Iha biban ida ne’e mós, Formadór Formasaun Profisionál Servisu Nain Sosiál-SNS, Gil da Cruz esplika, lolos formasaun ida ne’e ninia durasaun fulan 18, maibé sira konklui formasaun ida ne’e ho tinan 1 deit, tanba sira ho intensivamente organiza estudu ho di’ak.
"Materia ne’ebé ami hetan iha formasaun ida ne’e mak ligadu ho assismentu (penilaian), tanba presiza hatene uluk formandu sira ninia kapasidade hodi ita bele fó formasaun ba sira. Aprende mós estilu ba aprendizajen, liu-liu oinsá ita atu hato’o ita nia materia ba SNS sira," nia informa.
Formador haktuir, ba futuru, bazeia ba palanu estratéjia MSSI nian, liu-liu oinsá atu reforsa MSSI hodi kria institutu nasionál impaktu sosiál, ne’ebé ninia kna’ar mak atu hala’o peskiza, formasaun no halo sertifikasaun ba SNS sira.
"Tanba ne’e agora dadaun ami servisu hamutuk ho parseirus sira atu prepara ita nia rekursus humanus hodi bele realiza planu ne’ebé mak ita iha ona," katak nia.
