Prezidenti TLPU Candido Alves hatete, formasaun ne’e atu fasilita no aumenta koñesimentu jornalita sira nia iha lian inglés.

“Formasaun ne’e mós hanesan xave  importante tebes ba jornalista sira hotu, tanba lian hanesan kilat ida ne'ebé boot ba jornalista sira hodi luta. Bainhira jornalista sira ninia liafuan sala bele hamate ema hotu iha mundu, tanba ne'e liu husi lian tasi balun nia ka lian internasional no lian Timor ita tenki hatene hotu no tenki aprende hotu,”dehan nia iha Salaun TLPU, Taibesi, sesta (10/02).

Ho nune’e, Prezidenti husu ba jornalista sira ne'ebé atu tuir formasaun ida ne'e tenki aproveita didi'ak labele baruk atu aprende.

"Tanba bainhira ita jornalista sira lahatene lian ida susar tebes ba ita atu hakerek notisia ne'ebé di'ak, ba ema tasi balun sira ka ema estranjeiru hakarak ka lakohi ita tenki hakerek ho lian inglés," tenik nia.

Nia esplika, bainhira jornalista sira atu intervista ema estranjeiru sira tenki uza lian inglés, nune'e mós dalen tetun sai hanesan kilat musan ba jornalista sira hodi luta, bainhira kilat musan la iha susar atu luta.

Nia dehan, formasaun refere sei loke ba jornalista sira iha media hamutuk 22 iha teritoriu nasional ne'ebé prense ona kriteria TLPU nian no sai ona membru TLPU.

Iha fatin hanesan, Prezidenti Eleitu Konsellu Imprensa Otelio Ote hatete, formasaun ne'e importante tebes ba jornalista sira, tanba jornalista sira mak loloron kulturadu ho komunikasaun.

Nia dehan, durante ne'e jornalista sira iha abilidade atu koalia dalen tetun no inglés iha atividade jornalístiku no mós iha públikasaun sira.

Nia afirma, ohin loron Timor-Leste la’ós nasaun ida ne'ebé taka an ba nasaun sira seluk, maibé TL mós ohin loron nakloke entaun jornalista sira mós iha kapasidade atu koalia lian inglés hodi bele hateke ba mundu.

"Tanba TL mós prepara an ona atu sai membru ASEAN persiza tebe-tebes atu jornalista sira koalia lian inglés, tanba ita nia área kobertura liliu ba nasaun ASEAN sira kada tinan no kada fulan sei haruka jornalista sira ba kobertura iha ASEAN, tanba ne'e ema tenki iha kapasidade iha area dalen nian," nia haktuir.

Tan ne’e, nia akresenta, tempo ona jornalista sira iha abilidade lian inglés tanba agora eventu internasional barak mak iha Timor.

Nune’e, nia husu ba sira ne'ebé partisipa iha formasaun ne’e aproveita didi'ak ba no disiplina iha materia ne’ebé formadór sira fó.

Entretantu, formasaun refere sei hala’o durante fulan neen nia laran no kada semana iha formasaun dala rua ho oras tolu nia laran.

Enkuantu, formasaun refere hahú iha 11 fulan-Fevereiru 2023.