Aleinde, iha lansamentu fatuk dahuluk ba UNP kategoria A ne’e, iha mós distribuisaun zinko ba benifisiariu sira iha Suku Kamea no Suku Bairu Pite.
Ministru MAE, Miguel Pereira de Carvalho, hatete, lansamentu Uma Naroman ba Povu (UNP) ne'e, nia orsamentu mai husi Orsamentu Jeral Estadu tinan 2022 nian, ne’ebé aloka ba uma hamutuk 80 iha Munisipiu Dili.
Nia dehan, ida ne'e kontinua nafatin, hanesan parte ida husi programa oitavu governu konstituisional nian, ne’ebé hatete ona iha konstituisional RDTL katak, populasaun sira tenki goza direitu abitasaun no direitu ba fatin ne'ebé dignu.
“Ho hanoin ida katak povu sira presiza hahú hatur iha fatin ne'ebé dignu atu ita bele lori naroman ba sira, ne'e inisiu ida ne'ebé ita hakarak lori naroman ba ita nia povu infelizmente ha’u bele dehan katak ita nia governu konstituisional hahú ona UNP tama mai Dili”dehan nia iha Aldeia Lenuk Hun, Suku Kamea, Postu Administrativu Kristu Rei, segunda (13/02).
Aleinde, Ministru mós hatutan, populasaun barak mak sira nia uma kalen aat ka fruzu hotu ona, nune’e governu ajuda fahe zinco ba sira atu bele halo uma ne'ebé dignu.
Iha fatin hanesan, Sekretaria Ezekutiva PNDS Claudina Soares Pinto hatete, kondisaun sosial mós hanesan fatores determinantes ida ba implementasaun atividades ne'e.
Nia dehan, preokupasaun boot tebes iha Minisiupiu Dili mak estatutu rai ne’e rasik, difisil tebes atu bele hetan benifisiariu sira ne’ebé prense duni rekezitus.
"Tanba wainhira ita rejista benifisiariu sira, estatutu rai mak sai polemika tebes atu garante ita nia benifisiarius bele hetan UNP," nia esplika.
Tan ne'e, Sekretaria PNDS husu ba benifisiariu sira ba UNP plus B nian ne'ebé simu ona zinko, tenki uza labele fa'an fila fali.
"Ba benifisiariu sira ne'ebé simu ona zinco tenki uza labele fa'an fila-fali, atu nune'e programa ida ne'e la'o diak hodi nune'e governu tuir mai bele kontinua nafatin programa ida ne'e," katak nia.
Iha biban ne'e mos, benifisiariu Novianos de Fátima husi Suku Kamea hato'o agradese ba parte governu, tanba governu bele ajuda ona sira.
Entretantu, benifisariu ne'e husu ba governu atu distribuisaun zinko no UNP ne’e labele to'o iha sira deit, maibé kontinua nafatin ba maluk sira ne'ebé persiza governu nia tulun.
Enkuantu, iha Suku Kamea Uma Naroman ba Povu (UNP) plus A benifisiariu na'in 3 mak hetan no ba Plus B benifisiariu hamutuk 37.
Hafoin ida ne'e, MAE kontinua halo lansamentu ba UNP plus A hamutuk 4 no plus B hamutuk 37 husi aldeia 27 iha Suku Bairo-Pite Postu Administrativu Dom-Aleixo Munisipiu Dili .
