Nia dehan, treinamentu ne’e hetan apoiu husi Programa Dezenvolvimentu Polisia Timor-Leste (TLPDP-sigla inglés) ho UNICEF.

Nia haktuir, la fasil ba autoriedade polisia sira atu rekolla informasaun husi labarik no EhD, maibé ho treinamentu husi espesialista sira husi Australia ninian, bele ajuda investigadór sira iha prosesu rekolla informasaun.

“Ita hotu hatene katak prosesu la fasil, ita iha hela prosesu konstrusaun Estadu, maibé ita presiza halo esforsu hotu-hotu hodi kontinua fó protesaun ba labarik ho EhD, liliu sira ne’ebé vulneravel,”dehan komunikandu ne'ebé Online INDEPENDENTE sita, segunda (13/02).

Governante ne’e hatutan, ba investigadór sira bainhira tuir treinamentu ne’e aproveita opurtunidade ida ne’e ho di’ak, tanba atu sai investigadór ba labarik, investigadór rasik presiza hatene labarik sira-nia kondisaun real.

“La fasil ita atu atende labarik sira ne’ebé hasoru abuzu. Ha’u rasik asiste, kuandu iha problema balun ita tenke sai hanesan labarik sira-nia belun, ita tenke sai hanesan sira-nia inan-aman, ita mós tenke iha téknika oioin atu hetan informasaun loloos husi labarik no EhD sira," tenik Vise-Ministra.

Vise-Ministra mós énfaze kazu EhD ne’ebé lakon iha prosesu julgamentu tanba laiha tradutor lian jestual, hodi halo vítima lakon iha prosesu julgamentu.

Nune’e, Vise-Ministra lamenta ho situasaun ne’e, tanba iha Tribunál laiha tradutor lian jestual.

Vise hatutan, iha kazu ida rua ne’ebé vítima rasik ba ko’alia ho Ministériu Solidariedade Sosiál no Inkluzaun (MSSI), relasiona ho problema tradusaun, tanba iha kazu balun tama iha tribunál, vítima la intende esplikasaun husi juiz no juiz rasik defisil atu halo julgamentu, entaun vítima tenke lakon iha prosesu julgamentu. Problema ida ne’e Vise-Ministra hato’o ona ba Ministériu Justisa, fiar katak iha tempu badak bele iha ona tradutór lian jestuál iha tribunál sira.

Kona-ba lei protesaun ba labarik, ne’ebé aprova ona husi Parlamentu Nasionál, Vise-Ministra hateten, servisu tékniku sira la’o tiha ona, agora ho aprovasaun ba lei protesaun ba labarik, governu liuhusi MSSI inklui instituisaun sira ne’ebé servisu protesaun ba direitu labarik iha mahon MSSI nian no ajensia internasionaal sira, sei kontinua hala’o sira-nia servisu.

“Ba servisu sira ne’ebé ita presiza reforsa, entaun ho lei ne’e ita sei reforsa liutan hamutuk ho instituisaun no ajensia sira ne’ebé servisu ba direitu labarik”, tenik Vise-Ministra.

Ko’alia kona-ba labarik sira fa'an sasan iha estrada ninin, Vise-Ministra informa katak, iha lei protesaun ba labarik, iha artigu ida bandu atividades hanesan ne’e.

Tan ne’e, husi parte MSSI sei hala’o servisu liliu atu komunika ho inan-aman sira, atu haree asuntu ida ne’e, tanba inan-aman balun kbiit la to’o, entaun labarik sira hili dalan apoiu sira-nia inan-aman liuhusi fa'an sasan iha estrada ninin.

“Ba kestaun ne’e, tékniku sira sei halo verifikasaun ba dadus para depois governu bele tau matan. Maibé iha inan-aman balun, husik sira-nia oan hala’o atividades iha Estrada ninin, ida ne’e lei protesaun ba labarik bandu. Tan ne’e maka MSSI sei halao servisu rekolla dadus hodi haree situasaun família nian loloos ne’e vulnerável dunik, ka inan-aman sira mak halo abuzu ba oan sira,”tenik nia.

Iha fatin hanesan, Adjuntu Komandante Jerál PNTL, Komisáriu Mateus Fernandes, hatete, ba investigadór sira atu investiga labarik sira tuir lei no presiza akompañamentu ne’ebé diak husi inan-aman sira no tenki kuidadu didi’ak no fó protesaun ba labarik sira.

Adjuntu Komandante Jeral PNTL ne’e haktuir, treinamentu ida ne’e atu hakbiit investigadór sira atu hatoman-an hatene saida mak labarik sira hakarak.

Entretantu, Komandante TLPDP, Darren  Booy hateten, treinamentu ne’e atu ajuda investigadór sira espesialidade iha intervista ba labarik ho EhD ne’ebé hasoru abuzu.

Tan ne’e, treinamentu ne’e sei foka ba prátika di’ak sira iha prosesu investigasaun ba labarik, liu-liu atu hatene kona-ba maneira aprosimasaun.