Kona ba estrada, Nia dehan, foin lalais iha fulan-Agostu 2020 haruka ona karta ida ba Ministru no Vise Ministru Obras Publika, iha karta ne’e husu atu halo dalan tama ba postu Venilale to’o iha suku to’o ba iha aldeia.

Nia haktuir, antigamente dalan ne’ebé tama mai ne’e iha, maibé ponte ne’e rahun tiha nune’e la konsege halo dalan atu tama ne’e.

“Nune’e tuir fali mai, iha tinan 2021-2022, ami nia programa PNDS regular monu ba iha ha’u nia suku, entaun ha’u tau ba iha aldeia Uaitalibu no agora dadauk dalan ida tama nian ne’e ho susesu, ponte hadi’a ona maibé presiza saluran, tembok penahan no alarga tan estrada ida ne’e para halo dalan tama ne’e ho kondisaun ida ne’ebé tuir estandar sidade ida nian,”dehan nia ba Online INDEPENDENTE, via telephone, foin lalais ne’e.

Nia hatutan, foin lalais mós Xefe Suku ne’e hato’o karta ida ba Vise Ministru Obras Publika, atu halo dalan ida ne’ebé liga ba postu Venilale, Suku Badomori, Baduoho, Uaioli, Uailaha liga ba postu administrativu Kelikai no suku Uaibobo.

Kona ba estrada, nia dehan, proposta sira ne’ebé hato’o ona ba Vise no Ministru Obras Publika maibé to’o agora seidauk iha resposta.

Entretantu, ba problema eletrisidade, proposta ne’e to’o iha gabineti EDTL, EP no iha tempu badak sira sei halo diskusaun ba proposta refere.

Ba bee moos, nia dehan, jeralmente komunidade iha Venilale maioria sosa bee moos, tanba kanalizasaun ne’ebé iha tempu Indonezia no Portugués halo agora failla hotu ona no labele asesu.