Xefe Governu Timoroan to’o iha Palásiu Prezidensia Bogor simu ho serimónia ofisiál formatura, akompaña kanta inu nasionál País rua nian no tiru kainaun, hafoin ne’e Xefe Governu Taur Matan Ruak akompañadu husi Prezidente Jokowi kontinua ba Jardim Resintu Palásiu Bogor nian hodi kuda Ai-Kameli nu’udar jestu lasu amizade no kooperasaun.
“Tuir mai kontinua ho enkontru bilateral ne’ebé amigável tebes hodi diskute kona-ba kooperasaun bilateral País rua nian,”Online INDEPENDENTE sita iha komunikadu.
Iha enkontru bilateral ne’e, Xefe Governu Timor-Leste hetan akompañamentu hosi Ministra Negósius Estranjeirus no Kooperasaun, Adaljiza Magno, Ministru Ensinu Superiór Siénsia no Kultura, Longuinhos dos Santos, Ministru Transportes no Komunikasoins, José Agustinho da Silva, Ministru Turizmu, Komérsiu no Industria, José Lucas do Carmo da Silva, Embaixadór Timor ba Indonézia, Filomeno Aleixo no Prezidente Komisaun Nasionál Eleisaun (CNE), José Belo.
Enkuantu Xefe Estadu Indonéziu Jokowi, hetan akompañamentu hosi Ministru Sekretáriu Estadu (Mensesneg), Pratikno, Ministra Relasoins Exteriores (Menlu), Retno Marsudi, Ministru Indústria (Menperin), Agus Gumiwang Kartasasmita, Ministru Edukasaun, Kultura, Peskiza no Teknolojia (Mendikbudristek), Nadiem Makarim, Ministru Investimentu/Xefe Konsellu Koordenasaun ba Investimentu (BKPM), Bahlil Lahadalia, Vise-Ministru Justisa no Direitos Humanos (HAM) Edward Omar Sharif no Embaixadór Indonézia ba Timor-Leste, Okto Dorinus Manik.
Hafoin enkontru bilateral, kontinua ho deklarasaun konjunta ba Média. Iha deklarasaun konjunta ba média ne’e, Xefe Governu Timor-Leste enfase iha asuntu haat importante hodi fó agradesimentu ba Indonézia, mak hanesan, tinan 20 estabelesimentu relasaun diplomátika no kooperasaun RDTL-RI ne’ebé Timor-Leste mais benefisiadu husi relasaun no kooperasaun durante tinan 20 ikus ne’e, agradesimentu ba reforsu kooperasaun iha área fronteriza liuliu ba estabelesimentu Zona Komérsiu Livre iha área Fronteira Oe-Kussi, agradese apoiu Indonézia nian durante ne’e hodi ikus mai Timor-Leste konsege sai ona membru ASEAN observador no husu nafatin Indonézia nia apoiu ba prosesu road map atu sai membru pleno, no ikus Xefe Governu agradese tebes ba Prezidente Jokowi ba vontade di’ak atu hakotu lalais kestaun liña fronteira rai-maran liuliu segimentu rua iha Oe-Kussi ne’ebé seidauk rezolvidu atu bele kontinua avansa ba diskusaun fronteira tasi.
Entretantu, iha enkontru bilateral refere, asina mós Nota Kooperasaun entre Governu Timor-Leste no Indonézia iha área sira hanesan;
- Memorandu Entendimentu kona-ba Kooperasaun iha Ensinu Superior;
- Memorandu Entendimentu kona-ba Kooperasaun iha área Dezenvolvimentu Rekursu Humanos no Interkámbiu Koñesimentu;
- Memorandu Entendimentu kona-ba Kooperasaun iha área Tékniku Industrial;
- Memorandu Entendimentu kona-ba Kooperasaun iha área Meteorolojia, Klimatolojia no Jeofízika;
- Memorandu Entendimentu kona-ba Estabelesimentu Zonas Ekonomia Livre iha área Fronteirisas(Oekusi).
