Tuir observasaun online INDEPENDENTE hakturi katak, ekipa CAC to’o iha fatin, iha oras tuku 09:00, ekipa anti korrupsaun halo esplikasaun kona-ba desizaun detensaun no tula kedas manajer loja Dili Mart ne’e ba karreta hodi lori ba iha sela KAK iha Farol, Dili hodi submete ba prosesu investigasaun.
EAK mós kontinua ba Ministériu Turizmu Komérsiu no Indústria (MTKI) hodi tedein mós funsionáriu balun ne’ebé deskonfia involve direta no indireta iha kontra bandu ida ne’e.
Molok halo detensaun, CAC immediate hapara ona atividade fahe aihan liuhusi programa sesta baziku, ne’ebé fahe husi kompaña Dili Mart iha Super Merkadu Dili Mart Raikotu Dili.
Asaun ne’e CAC foti hafoin Kuarta-feira (9/12), Espesialista Anti-Korrupsaun (EAK) sira hala’o hela knar iha terenu hodi monitoriza prosesu fahe aihan Sesta-Basika. Maibe, EAK sira detekta batar fohuk, koto no modo tahan dodok sira ne’ebé atu fahe ba populasaun konsumu.
Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun Luis de Oliveira Sampaio mak lidera ekipa Espesialista Anti-Korrupsaun (EAK).
Ekipa EAK mos prende café falun balun tanba la tuir lista gramas no folin ne’ebé Ministeriu Komersiu no Industria (MCI) determina. Maibé, iha terenu kompaña Dili Mart fahe la tuir ninian kilogaramas determinadu.
“Batar ne’ebé fohuk ho modo ne’ebé dodok ami (prende) no sei halo prosesu. Depois ami sei notifika Nain ba Loja (Dili Mart) ne’e ho ninian responsavel sira. Autoridade kompetente (iha MCI) ne’ebé durante ne’e akompaña. sira ninian responsabilidade atu halo supervizaun. Sira mai e sira haree hela mais husik hela deit. (Pesoal MCI) sira ohin iha ne’e hela mais sira haree deit no la intervein. Sasan sira ne’e la refleta kualidade ne’ebé mak ita nian povu merese hetan no valor ($50) ne’ebé mak iha,”Komisariu Adjunto Luis Sampaio hateten.
Komisariu ne’e mos hatutan, CAC antes ne’e deskobre sirkumstansia hanesan iha fatin seluk’ Hera, Metinaro no Liquica maibé kompaña no autoridade kompetente la hadia.
“Entaun ohin ami halo intervensaun hodi hapara distribuisaun Sesta Bazika ne’e. Ami aviza tiha ona mais sira lakohi hadia. Entaun ami hapara no lori sasan (fohuk ho dodok) sira ne’e ba no halo prosesu investigasaun tuir mai,” Komisariu Adjunto Luis Sampaio afirma.
