Nia dehan, presiza konstrui Portu foun bá Komponente Navál, tanba kondisaun portu atuál, la kon disiona ona no lakleur tán F-FDTL sei simu doasaun ró 2 husi Governu Australia, tanba ne’e presija duni hadi’a portu navál.
“Ha’u tau ona iha planu nia laran para halo konstrusaun, ne’e duni kuandu ita hakarak ne’e, ita sei preparadu no sei la repete fali sala sira ne’ebé uluk halo. Tanba, agora dadauk ita atu fó solusaun ba problema sira manutensaun, rehabilitasaun, meius infra-estruturas sira,” informa “Falur Rate Laek” ba Jornalista sira iha ambitu komemora seremónia aniversáriu Komponente Navál iha baze Navál Hera, (12/01).
Nia afirma, konstrusaun sira ne’e agora sira mak temi ona kona bá dezenvolvimentu forsa nian, komandu halo ona lei ida kona bá aprovizionamentu bá militár nian, oras ne’e iha ona Komisaun B Parlamentu nasionál.
Antes ne’e, iha loron 13 Agostu 2021, Governu Timor-Leste husi Ministru Defeza (MD), Filomeno da Paixão de Jesus ho Embaixador Australia iha TL, Petter Roberts asina ona akordu ba konstrusaun Portu Naval iha Hera.
Liu husi akordu kooperasaun ne’e governu Australia hakarak ajuda Timor-Leste halo konstrusaun ba Portu naval, to’o finaliza hodi prepara ba simu ró 2 ne’ebe governu Australia rasik mak sei oferese tuir planu sei entrega iha tinan 2023, maibé portu naval seidauk halo kontrusaun.
