Ministru Edukasaun Juventude no Desportu Armindo Maia, hatete, iha faze dahuluk, MEJD sei inagura eskola hamutuk atus ida, iha teritoriu laran tomak, ne'ebé remata ona nia konstrusaun, iha fulan-Janeiru ne’e nia laran.

Nia dehan, MEJD konsidera katak, Oitavu Governu da-ualu tau duni prioridade ba asuntu edukasaun, tanba edukasaun mak savi ba dezenvolvimentu rai ida ne’e nian.

“Tanba ne'e, iha tinan ida ne'e MEJD sei inagura eskola hamutuk atus rua (200) iha teritoriu nasional,”dehan nia iha ESJ 04 Setembru UNAMET Balide, Dili, segunda horseik (16/01).

Governante ne’e hatutan, aleinde, iha loron ikus fulan-Fevereiru tinan ne’e mós sei lansa tan eskola eskola ne'ebé konstrui foun no rehabilita hamutuk atus ida (100) tan.

Enkuantu, eskola hirak ne'ebé atu inagura ne'e, orsamentu mai husi orsamentu Jeral Estadu tinan 2022 nian.

Entretantu, Ministru ne’e akresenta, tuir planu, iha tinan ne’e (2023) MEJD harii tan eskola hamutuk 300 iha teritoriu laran tomak.