Tuir observasaun diario INDEPENDENTE iha terrenu, segunda ohin (20/3) katak, urnas hahú loke iha kada sentru votasaun iha tuku 7:00 horas Timor-Leste.

Hanesan iha sentru votasaun Eskola Primaria Fatuhada Dili, urnas hahú loke iha tuku 7:00, akompaña husi observadór sira, Fiskais sira no hetan seguransa maximu husi Polisia Nasionál Timor-Leste.  

 Iha fatin seluk, sentru votasaun iha Eskola Primaria Farol no sentru votasaun iha Eskola Primaria Tuana-Laran, populasaun sira hahú forma iha tuku 7:00.

Populasaun antusiasmu tebes hodi tuir votasaun.

Tuir votante ida Julio da Costa, idade tinan 23 iha sentru votasaun Tuana-Laran hatete, nia nu’udar  Timor-oan tenki ezerse nia direitu hodi bele deside distiñu nasaun nia futuru.

Tanba, husi nia votu ne’e atu hili lider ida atu bele sai presidente ba povu tomak.

Nia mós husu ba kandidatura sira atu bele simu rejultadu saida de’it mak atu mosu, tanba ne’e desizaun povu nian. Nia dehan, husi kandidatu na’in walu (8) ne’e, kandidatu ema ida de’it mak sei manan, maibé rejultadu ne’e Vitoria nasaun ba nasaun no povu. Tanba lider sira tenki hamutuk atu bele kontinua dezenvolve nasaun ne’e. “Ami espera katak lider sira temki hamutuk haree povu nia moris no nasaun nia futuru, maski nia rejultadu tenki ema ida mak manan maibe konsidera ita hotu manan liu husi prosesu demokrasia,”dehan nia.

Eleisaun presidensiál ne’e loke iha tuku 7:00 dader no sei remata iha tuku 3:00 lorokraik. Prosesu kontajen sei hahú iha tuku 3:00 lorkraik too remata.  

Sekretariadu Tekniku ba Eleisaun rejista votante hamutuk 731.000. Total sentru votasaun 944, inklui sentru votasaun iha Portugal no Darvin, Sydney (Australia).