Hanesan públiku hatene, Prezidente Eletrisidade Timor Leste, Empreza Públiku (EDTL,E.P) kada fulan simu salariu $6.500, no Prezidente Bee Timor Leste, Empreza Públiku (BTL,E.P) ho salariu $6.000 kada fulan.

Diretór Ezekutivu Luta Hamutuk, José Alves da Costa hatete, desde uluk nia parte hakarak atu EDTL no BTL tenke sai Empreza Públiku, atu bele halo jestaun rasik hodi asegura eletrisidade no bee ba konsumidór sira.

Iha nasaun barak, nia hatutan, eletrisidade no bee sempre sai empreza públika, nune’e nia bele iha indepedénsia hodi halo jestaun.

Buat ne’ebé sai preokupasaun iha Timor Leste mak EDTL ho BTL ladun servisu masimu. Eletrisidade mate-lakan, bee-moos sei sai problema boot, maibé sira-nia jerente simu salariu boot.

"Se karik nono governu iha ona desizaun katak tenke kontinua sai hanesan EP, ha'u hanoin ne'e di'ak, maibé presiza haree sira-nia salariu, ne'e de'it. Salariu ne'e labele as liu fali Prezidente Repúblika ninian," dehan José ba jornalista Jornál INDEPENDENTE, iha nia kna'ar fatin, Faról, Kuarta (26/07).

LH, nia hatete, husu ba ministériu ne'ebé tutela atu tau-matan didi'ak ba servisu EDTL no BTL nune’e bele fó distribuisaun ne'ebé másimu ba konsumidór.

"Sira tenke buka osan masimu atu bele finansia sira-nia an, no governu fó de'it subsidiu 70% husi Orsamentu Jerál Estadu, restu ne'e sira mak buka rasik,” dehan nia.

Molok ne’e, Ministru Obras Publika, Samuel Marçal informa, governu dasia la muda estatutu husi Eletrisidade Timor Leste (EDTL) no Bee Timor Leste (BTL).

“See mak muda? Ema la muda buat ida. EP sira ne’e sei mantein,” dehan Samuel ba jornalista Jornal INDEPENDENTE hafoin Konsellu Ministru aprova organika governu dasia, iha palasiu governu, Segunda (24/07).

Entretantu, Sekretáriu Estadu Eletrisidade, Água no Saneamentu (SEEAS), Santos Noronha hatete, governu sei mantein EDTL,EP no BTL,EP tanba sei hein lei organika governu nian.

“Ita seidauk hanoin atu muda BTL.EP ho EDTL.EP to’o iha ne’ebá (sai diresaun). Ita sei kontinua ho Empreza Públiku, depois hein lei organika sai mak foin diskute, mais provizoriamente seidauk,” dehan Santos hafoin debate programa governu dasia, iha Parlamentu Nasional, Kuarta (19/07).

Hatan ba karik sei muda duni sai diresaun, SE ne’e hataan, nia seidauk hatene tanba seidauk iha lei organika.