Vise Reitór Daruak Universidade Dili, Hugo Lourenco da Costa hatete, kriasaun sidade universidade Aileu nu’udar programa governu daualu nian, no la tama iha programa governu dasia nian.

Tuir nia, sidade universitariu ne’e la presiza loke tanba sei gasta osan barak no estraga fatin ne’ebé iha potensia sai nu’udar fatin ba industria.

“Sidade Universitariu ne'e la prioridade. Antes atu loke ne'e tenke hadia nia kualidade. Kualidade infra-estutura sira, kualidade rekursu no fizika, no ba rekursu umanus,” dehan nia iha nia knar-fatin, Kuarta (26/07).

Iha fatin ketak, Diretór Ezekutivu Luta Hamutuk (LH), José Alves da Costa preokupa ho osan ne’ebé governu daualu gasta ona.

“Presiza tetu didi’ak, labele mai ho emosaun tanba diferente partidu. Labele dehan programa ne'e oitavo governu ninian, nia labele kontinua. Tenke tetu ho didiak lai, tanba buat hotu-hotu uza osan. Ita labele estraga povu nia osan,” dehan nia.

Tuir nia, Sidade Dili ne'e estudante husi foho barak ona, tan ne’e governu daualu harii Sidade Universidade  iha munispiu Aileu atu estudante sira bele ba eskola iha ne'ebá.

Iha Parlamentu Nasionál (PN), Prezidente Bankada Partidu Demokrátiku, António da Conceição ‘Kalohan’ prefere liu atu harii sentru formasaun ba professor sira duke harii sidade univerdade Aileu.

“Tanba terseiru kongresu nasionál edukasaun ni’an, ha’u mak ministru naton ne’e hodi hala’o terseiru kongresu edukasaun, preve atu harii mós, la’os sidade universidade iha Aileu, maibé sentru ida ne’ebé mak importante ba formasaun profesores no eskola ba profesores, bainhira ita ko’alia kona-ba edukasaun nia autór prinsipál mak profesór sira,” dehan Kalohan.

Se profesór sira di’ak, edukasaun la’o di’ak no rai ida ne’e sei iha sosiedade foun.

Molok ne’e, Ministru Edukasaun Superiór, Siénsia no Kultura (MESSK), José Honório Jerónimo informa, Governu dasia laiha planu atu kontinua Sidade Universitária Aileu, maibé sei investe maka’as iha Universidade Nasionál Timor Lorosa’e (UNTL) nu’udar instituisaun ensinu superiór públiku hodi garante kualidade estudante sira nian.

Nia dehan, desizaun Governu dasia nian la kontinua dezenvolve prosesu konstrusaun sidade universidade ne’e, tanba konsidera la nesesária.

“Ita hapara hodi la kontinua prosesu ba Sidade Universitária Aileu ne’e la’ós desizaun ministru nian, maibé Governu dasia, tanba la nesesária, maibé ita iha ona hanoin atu investe ba UNTL,” dehan nia.

Entretantu, Governsaun  daualu prevee ona millaun $2,1 ba indenimizasaun no hasai ona $1.037,987 hodi selu família 44 ne’ebé lakon uma, no abitante 58 ne’ebé lakon sira-nia ai-horis no 102 ne’ebé lakon ona rai.