Enkuantu, Govenu seidauk kria kondisaun ne’ebé seguru mak, negosiante sira lakohi sai husi fatin refere.

Negosiante Ambulante, Floriana Balita Soares hatete, sira lakohi muda husi sira nia fa'an fatin tanba sira la'os fa'an sasan maibé sira fa'an de'it ai-han ho hahan.

"se Autoriedade Munisipiu Díli mak hakarak muda fali ami ba merkadu mós ami lakohi, tanba iha merkadu ema barak mak fa'an ona, se ami ba tan mak ema sei la sosa ami nia sasan," dehan Negosiante iha Largo Lecidere, Tersa (25/07).

Negosiante dehan, sira fa'an ai-han ho hahan de'it, fatin hanesan jardin ida ne'ebé joven no estudante sira sempre pasa tempo, entaun sira aproveita oportunidade ida ne'e hodi hala'o sira nia négosiu.

"Ami fa'an iha ne'e ai-han ka hahan de'it, tanba estudante no jovem sira barak mai iha fatin ne'e, entaun ami fa'an iha ne'e, atu nune'e buka netik osan oituan hodi sustenta ami nia moris no oan sira nia eskola," katak nian.

Iha fatin hanesan, Vendedor Alito Guterres hatete, bainhira governu lokal atu hasai vendedor sira husi Largo Lecidere tenki kria uluk lai fatin no kondisaun.

Nia dehan, klaru ke lai nu.33/2018 katak área lecidere ne'e área protejida, katak sidadaun hotu-hotu labele fa'an iha fatin refere.

"Maibé nudar defeza ita ko'alia kona-ba área protejida, iha lei mós hatete katak área protejida la iha ema ida atu fa'an sasan, maibé sidadaun mós iha nia direitu atu okupa, la'os atu sai na'in ba rai ne'e, maibé halo sira nia ativide," nia esplika.

Nia esplika, vendedor ambulante kopera ho justisa no kopera ba lei, maibé tenki kria kondisaun.

Bainhira Governu lokal sira hasai vendedor ambulante sira husi fatin refere, atu lori fali ba fatin ida ne'ebé no fatin área turizmu ne'e governu sira atu halo fali saida.

Tan ne'e nudar defeza atu dehan de'it, governu dasia liu husi munisipal Dili tenki tau atensaun ba komunidade hodi kria kondisaun.

Entretantu, molok ne’e, Diretór Servisu Munisípais Jestaun Merkadu no Turizmu, Artur Henrique hatete, Dekretu Lei kona-ba Ijíene Orden Públika ne’e nia natureza atu kontrola no fiskaliza politika no administrativamente ba armonizasaun ordenamentu territóriu, liu-liu iha kapitál Dili.

Ho naturaza ne’e, Artur dehan, nia parte hala'o ona publikasaun, fahe informasaun liu husi auto flante (pengeras suara) no distribui ona mós sirkular númeru 416 ne'ebé asina husi Prezidente Autoridade Munisípiu Dili ba vendedor sira ne'ebé okupa area protejida.

Largo Lesidere, tuir nia, nu’udar area protejida tan ne’e labele iha okupasaun ne'ebé fó imajen la di'ak ba sidade Dili.

Iha Largo Lesidere, nia dehan, konstrusaun ne'ebé vendedor sira harii hanesan animal nia luhan.

“Timor ne'e ukun aan tiha ona, kapitál nasaun Timor Leste, Dili, mais haree Dili ne'e hanesan fali fahi nia luhan. Entaun saida mak Autoridade Munisípiu Dili halo mak hala'o nia knaar ne'e bazeia ba lei. Ami ba hato'o ba sira, tanba sira hela ne'e ilegalmente, mais la hatene katak fatin ne'e jardin,” dehan Artur foin lalais ne’e.

Aleinde sira ne’ebé fa’an iha Largo Lesidere, autoridade mós aviza ba negosiante ne’ebé fa’an iha trotoar leten, no aviza mós ba sira ne’ebé tau besi aat ka kareeta aat ida dalan ninin.

“Ami fó avizu tiha ona ne'ebé sira tenke kumpre, se lae, ami foti medidas. Sira muda (volutariu) lae ami mak ba hasai sira-nia sasán didi'ak.”

"Sira tenke hamamuk fatin, se lae dia 1 to'o 2 fulan Agostu ne'e ami mak sei tuun sobu rasik," nia dehan.

Hatan ba karik autoridade prepara ona fatin ba negosiante sira iha Largo atu kontinua sira-nia atividade negosiu, nia dehan, ema husi Bidau-Lesidere ne’ebé fa’an sasan iha Largo ne’e ida-rua de’it, maioria husi Aileu, Baukau no Vikeke.

"Ne'ebé ita tenke aranza fatin hotu-hotu par ema sira mai husi foho ne'e faan sasan? Ha'u hanoin ne'e la hanesan ne'e. Dili ne'e iha merkadu nasionál rua de'it, ida mak Manleuana no (seluk mak) Taibesi.”

Tan ne’e, nia afirma, hakarak ka lakohi, sira tenke sai husi fatin ne’ebá, tanba sira hela illegal no halo kapital Dili sai hanesan fahi luhan.