Maske Xefe Estadu ne’e dehan, nia sei la fó ninia hanoin ba OJE 2020 molok PN diskuti no aprova hodi haruka ba Prezidente Repúblika atu promulga, maibé nia preokupa uitoan kona-ba diskusaun OJE 2020 ne’ebé tarde.

“Ita haree katak diskusaun (OJE 2020) ne’e tarde ona, iha fulan Janeiru ne’e normalmente kuandu atraza orsamentu iha duadésimu atu kontinua asegura nafatin mákina estadu nian, só ke realmente dezenvolvimentu ne’e atraza, la’ós dehan la la’o maibé atraza,” dehan PR Lu Olo iha Sentru Konvensaun Dili, Sesta (20/12).

Entretantu, iha Kinta (19/12), governu AMP ne’ebé lidera husi Primeiru Ministru Taur Matan Ruak aprezenta fila fali ona proposta OJE 2020 ba Parlamentu Nasionál. Iha proposta foun ne’e, governu hatuun montante OJE 2020 ne’ebé molok ne’e hamutuk billaun $1.95 ba billaun $1.6.

Ba montante OJE 2020 ne’e, Prezidente Bankada CNRT iha PN, Duarte Nunes konsidera governu kumpri ona ezijensia bankada parlamentar sira hodi redus montante OJE 2020.

Iha aprezentasaun daruak ne’e, Duarte informa, governu husu ho karater urjensia.

“Sira (governu) husu urijensia, lei premite kuandu mai urujensia ne’e iha regras ami sei halo tuir regras rezimentu ne’ebé mak iha. Governu mak intende hodi presija la’o lalais, hodi labele halo audiensia naruk hanesan uluk,” dehan nia.

Kona-ba proposta foun OJE 2020, Duarte dehan presiza haree hamutuk karik iha buat ruma ne’ebé kontra lei.

“Governu hatuun (montante OJE 2020) tuir ezijensia deputadu hothotu nian, tuir duni povu presiza, karik buat ruma kontra lei ruma, ita presija haree hatumuk, maibé buat hotu lao di’ak,” dehan nia.

Ba montante OJE 2020, Prezidente Bankada CNRT ne’e hatete, governu presiza halo esplikasaun klaru ba deputadu sira.

“Ida ne’e mak ita sei buka esplikasaun, hanoin governu sei mai esplika, hothotu sei akompaña serake ida ne’e loos ona, hothotu konkorda ona,” dehan nia.

Iha fatin hanesan, deputada Bankada KHUNTO Olinda Guterres aseita ho karater urjensia OJE 2020.

“Ha’u hanoin Orsamentu Jeral Estadu presiza duni karater urijente, ita labele moris ho osan duadesimu tempu naruk, ami partidu KHUNTO nia pozisaun sempre apoiu ba governu,” dehan nia.

Tuir nia, governu hatuun montante OJE 2020 ba billaun $1.6 ne’e sufisiente ona.

“Maibé tama diskusaun mak haree took, karik ministeriu balun sei hetan alterasaun seidauk hatene, maibé orsamentu ida naton ona hodi halo dezenvolvimentu.

Entretantu, Vise Prezidente Bankada PLP Francisco de Vanconselos hatete, nia parte apoiu governu.

“Tanba kestaun tempu lalais di’ak liu, maibé plenaria parlamentu nasionál mak sei deside karakter urijensia ka lae, tanba governu kumpri ona halo redusaun biliaun $1.668 ne’e razoavel tuir planu husi governu,” dehan nia.

Tuir nia, redusaun maka’as ba OJE sei fó impaktu ba dezenvolvimentu, maibé tenke tuir kapasidade governu nian.

“Ami-nia pozisaun katak estadu ne’e tenke moris, laiha estadu mak moris sein orsamentu,” nia dehan.