Liu husi votasaun, Riak Leman ne’ebé tama iha pakote B konsege manan ho votus 145 hodi halakon pakote C ne’ebé hetan de’it votus 14.

Estrutura foun KKLN kompostu husi Riak Leman (Prezidente),. Faustino dos Santos alias Renan Selak (VPFA), Marito Reis (VPFK), no Ines de Almeida (VPFE).

Hafoin eleitu sai Prezidente KKLN, Riak Leman promete iha ninia mandatu tina lima sei serbisu maka’as hodi tau-matan di’ak liu tan ba veteranu sira, liu-liu sira ne’ebé seidauk simu pensaun no seidauk iha uma.

Atu realiza planu ne’e, nia dehan, ba dahuluk nia sei buka atu halibur veteranu sira hotu

“Knaar ne’ebé ha’u assume la’os atu ba tur de’it, maibé ba hodi halo serbisu, entaun simu knaar ida ne’e atu akumula veteranu hotu-hotu iha Munisipiu 12, inklui RAEOA, ne’ebé sei hasoru hela problema barak iha baze ne’ebá,” Riak Leman promete.

Ba problema ne’ebé veteranu sira sei hasoru, Riak Leman esplika, sei buka atu rezolve problema veteranu ne’ebé seidauk simu pensaun, no veteranu nia oan balun ne’ebé to’o ohin seidauk asesu ba edukasaun no la hetan bolus estudu.

“Veteranu nia oan sira tenke asesu ba edukasaun di’ak… entaun politika Prezidente KKLN (mak) sei kria edukasaun, no fó bolus estudu ba veteranu nia oan sira, prepara aban-bainrua bele sai futuru di’ak ida ba nasaun”.

Ida seluk, Riak Leman dehan, nia sei haree mós gerileiru sira ne’ebé hafoin ukun aan hela iha ema nia rai, uma laiha, balu ba koa hela tua hare’e karau, no balun halo toos no natar.

Nia parte sei koordena ho Ministériu Veteranus nia atu tau osan hodi harii uma ba sira.

Planu seluk, Riak Leman dehan, nia sei esforsu an atu transforma fatin istoriku sira sai objetu turizmu istoriku.

Aleinde ne’e, nia dehan, sei esforsu móa atu rekolla hotu saudozu sira-nia mate-ruan ne’ebé to’o ohin seidauk rekolla hotu.

“Aban-bainrua Konsellu (KKLN) koordena ho Ministériu Veteranu halo oinsa atu bele harii Monumentu iha Postu Administrativu sira, nune’e martires ne’ebé ruin buka la hetan bele hakerek sira-nia naran iha monumentu ne’eba hodi valoriza,” dehan nia.

Aleinde ne’e, nia dehan, Ministériu Veteranu liu husi Sekretariu Estadu Antigu Kombatente Libertasaun Nasionál hakarak kria fundus ida ba veteranu sira.

“(Tinan) 2020 parese sei koa veteranu sira-nia osan $30 kada fulan, kria fundu ida ne’ebé sei fó posivel atu bele kria mós banku rasik, tanba haree iha Timor ne’e (veteranus) 27-28 mill tinan ida hetan ona $10 milliaun.”

“Ha’u hanoin $10 millaun ida ne’e bele kria ona banku, maibe jestaun mak tenke di’ak, entaun identifika kada munisipiu problema iha ne’ebé bele lori fundu ida ne’e hodi rezolve, no fundu ne’e mós hodi bele haree ba veteranu nia oan sira, faluk, oan-kiak hodi hadia sira-nia moris,” deklara nia.