Bankada CNRT halo ona verifikasaun no identifika katak OJE 2019 iha fin-du-anu barak liu ezekuta la tuir orientasaun klaru. Tanba osan ne’e uza ba formasaun iha estranjeiru maka domina liu.

“Barak liu nia ezekusaun halai liu ba treinamentu iha rai li'ur. Ida ne’e akontese iha ministériu no instituisaun hotu-hotu,” dehan deputada CNRT, Virgínia Ana Belo, iha Uma Fukun PN, horisehik.

Tuir nia haree, treinamentu ne’e la’ós ba funsionáriu foun sira, maibé diretór, no xefe departamentu sira. Maibé, tuir loloos ema sira la presiza aproveita hotu oportunidade hirak ne’e, tanba sira sai lideransa iha instituisaun tanba iha ona kapasidade jestaun.

“Ita hasoru ema barak tebes diretór sira no xefe departamentu sira iha Bali no Jakarta, hotu-hotu ba tuir treinamentu kuandu fin-du-anu ona”, tenik nia.

Tuir Virgínia, hakarak fó kapasitasaun tuir loloos ba funsionáriu sira hodi bele aprende no prepara sira ba futuru. Maibé, iha nasaun ne’e diretór no xefe departamentu sira maka hadau hotu.

Kompleta Governu Antes Debate OJE 2020

Entretantu, Bankada Partidu Demokrátiku (PD), husu atu kompleta estrutura governu ne’ebé sei mamuk hela antes halo debate ba OJE tinan fiskál 2020.

Kompleta estrutura governu atu ezekusaun OJE iha tinan oin mai labele hetan impedimentu tanba membru governu inkompletu.

“Di'ak liu kompleta estrutura hodi garante orsamentu reflete duni nesesidade prioridade governu ninian no responde ba povu nian nesesidade. Importante tau uluk estrutura”, dehan Prezidente Bankada PD, António Da Conceição.

Tuir nia, agora sei falta membru governu atu halo ezekusaun ho di'ak. Ne’e duni, presiza kompleta uluk tanba bainhira prosesu la’o ona mak membru sira ne’e tama dala ruma sira rasik la entende polítika ezekusaun ne’e rasik.

Iha fatin hanesan, Deputadu Bankada CNRT, Adérito Hugo da Costa hateten, iha konferénsia nasionál AMP klaru tebes. Iha nesesáriu atu reformula estrutura governu atu halo remodelasaun.

Direitu prerrogativa remodelasaun tuir konstituisaun ne’e Primeiru Ministru, maibé kompozisaun governasaun liuhusi aliansa, entaun direitu prerrogativa ne’e la'ós absoluta, tenke koordena ho partidu ne’ebé ke hamoris governu.

“Agora depende ba primeiru ministru no lideransa atu haree, reformula estrutura mak uluk ka halo rua ne’e dala ida kedas”, dehan nia.

Reformulasaun ne’e atu haree ba asuntu ne’ebé interese nasionál no kompromisu eleitorál hodi tau Estadu aas iha mandatu governu nian kona-ba proprama tinan lima nian bele konkretiza.