Tuir eis Prezidente Repúblika José Ramos Horta, impase politika ne’ebé daudauk ne’e akontese, mosu tanba Prezidente Repúblika Francisco Guterres Lu Olo la fó pose ba membru governu na’in sia (9). Husi númeru ne’e, na’in hitu (7) mai husi partidu CNRT, no na’in rua (2) seluk mai husi partidu KHUNTO.

Atu rezolve problema ne’e, Premiadu Nobel da Pas ne’e hanoin katak presiza iha dialogu entre lider sira.

Maibé, atu realiza dialogu ne’e, dalan uniku mak PR Lu Olo tenke fó pose ba membru governu na’in 9 ne’ebé tama iha lista pendente.

“Ita bele halo interperetasaun Prezidente (Repúblika) iha podér ou laiha podér, governu aprezenta lista ida prezidente la fó pose, sei rezolve tiha lista pendente fiar Xanana hakarak halo dialogu,” deklara Ramos Horta iha ninia diskursu ho tema lideransa, iha kongressu TLPU,  iha Golgota, Sesta (20/12).

Maske nune’e, Horta fiar katak lider sira sei hetan solusaun hodi rezolve problema ne’ebé iha.

“Ha’u fiar iha Maun Xanana, Taur Matan Ruak Presidente Francisco Guteres Lu Olo no Alkatiri nia kapasidade atu rezolove situasaun ne’e halo mós dialogu,” dehan nia.