Bankada opozisaun iha PN, FRETILIN, kestiona prosesu aprezentasaun proposta OJE 2020 ne’ebé governu AMP halo.

Prezidente Bankada FRETILIN iha PN, Aniceto Guterres hatete pozisaun bankada FRETILIN la apoiu pedidu urijensia governu AMP tanba PM Taur la kumpri ninia promesa atu submete fali proposta OJE 2020 iha 13 Dezembru.

“Iha momentu proposta lei OJE (2020) retirada Primeiru Ministru promete sei submete fali mai 13 Dezembru, maibé la konsege, to’o loron 19 Dezembru mak haruka mai hodi husu karater debate urijensia.”

“Karik urijente duni, tanba sa mak iha loron 13 Dezembru la haruka mai kedas, problema iha ne’ebé?, mai atraza ona, adia tán to’o 19 Dezembru, mai husu tán karater úrijénsia. Proposta tama mai parlamentu depois 20 Dezembru, Primeiru Ministru ba ferias, sa urijensia mak ida ne’e,” Aniceto kestiona.

Deputadu ne’e dehan, pedidu karater urijensia mai ho proposta foun, signifika katak iha prosesu foun, loloos la tama iha lejislasaun komun ne’ebé proposta orsamentu ne’e retira husi plenaria, tanba aprezentasaun orsamentu kada tinan dala ida no planu aprezentasaun mós definidu.

Maske hetan kritika, maibé realidade PN konsege aprova pedidu husi governu ba debate OJE 2020 ho karater urijensia ho votus a favor 37, enkuantu deputadu husi bankada FRETILIN deside hodi la hiit kartaun.

Molok sesaun plenária, Prezidente Parlamentu Nasionál Arão Noé De Jesus Amaral informa, PN realiza sesaun plenária hodi halo apresiasaun ba pedidu urijensia.

“Se plenaria delibera ho pedidu urijensia ida ne’ebé governu submeter, ita bele halo ajenda hodi redus de’it audiensia, maibé labele hamenus tempu ba debate iha jeneralidade no espesialidade,” dehan Arão molok sesaun plenaria.

Iha fatin hanesan, Deputadu Bankada CNRT Aderito Hugo da Costa konsidera proposta OJE 2020 la’os kategoria lejislasaun komun, maibé prosesu lejislasaun espesial, tan ne’e submeter iha 15 Outubru kada tinan.

“Maibé hatete mós, tan nia prosesu lezislasaun espesial ne’e mak iha rezime duadesimu hodi nunee kualker sirkuntansia orsamentu seidauk aprova ate 1 Janeiru kobre despeza estadu nian ate masimu Fevereiru,” nia esplika.

Prezidente Bankada PD, Antonio da Concenção dehan, iha rejimentu PN artigu 97 fó dalan atu simu proposta lei ne’ebé tama kategoria karater urijensia.

“Ida ne’e baze ne’ebé governu mós husu ba ita, agora haree fila-fali ba proposta ida ne’ebé mak aprezenta husi governu ne’e konten asuntu no materia ne’ebé mak importante ba vida nasaun nian mak orsamentu jeral estadu,” dehan nia.

Entretantu, Ministru Reforma Lejizlativa Asuntu Parlamentár (MRLAP) Fidelis Leite Mangalhães hatete, parte governu esforsu hodi hatama lalais proposta OJE 2020 ba PN atu dudu prosesu sira ne’e nune’e Prezidente Repúblika iha tempu hodi tetu no foti desizaun.