Maibé, realidade, prezente Natal ne’e la fó ba mediku tomak iha HNGV, maibé fó de’it ba sira ne’ebé okupa kargu xefia.

Funsionariu HNGV ida ne’ebé lakohi públika nia identidade hatete, tuir informasaun ne’ebé nia hetan, parte finansas HNGV husu orsamentu rihun $20 ba Konsellu Diretiva HNGC atu sosa prezente Natal ba funsionariu tomak iha HNGV.

Maibé, nia dehan, realidade, prezente Natal ne’e fó de’it ba sira ne’ebé okupa kargu xefia.

“Prezente (Natal) sira ne’e (membru) Konsellu Diretivu na’in 5, Xefe Departamentu na’in 14, no Xefe Unidade na’in 32 de’it mak hetan,” dehan nia iha nia knar fatin, foin lalais.

Funsionariu ne’e lamenta tanba lideransa iha HNGV la konsidera sira nu’udar ajente HNGV.

“Osan ne’ebé aprova ne’e boot, maibé tanba sa mak prezente ne’e la fahe ba funsionariu HNGV hotu-hotu?,” nia kestiona.

Entretantu, to’o notisia ne’e hatuun, Jornalista Jornal INDEPENDENTE Elsa Belinha seidauk konsege halo konfirmasaun ho parte kompetente iha HNGV.