Realidade hatudu katak, hafoin estudante universitariu sira remata sira-nia estudu, sira la halo buat ida, atu asesu de’it ba kampu serbisu mós susar ona, sa tan atu loke rasik kampu serbisu ba ninia aan.

Ministru Ensinu Superiór Siensía Kultura (MEESK) Longuinos dos Santos rekoñese iha dezafiu boot ba lisensiatura sira ne’ebé kada tinan universidade públiku no privadu sira produs.

“Ohin estudante sira termina ona sira-nia estudus, dezafius ba oin mak oinsa atu buka serbisu husi forma oioin atu kontribui ba dezenvolvimentu nasionál,” dehan Ministru ne’e hafoin partisipa iha serimonia graduasaun estudante husi Institutu Kristal ba XI, iha Sentru Konvensaun Dili, Segunda (23/12).

Maske nune’e, tuir nia, dezafiu ne’e normal no tan dezafiu ida ne’e mak ministériu ensinu superior eziste.

“Ministru Ensinu Superiór (sei) esforsu an atu hadia kualidade (rekursu umanu) liu husi pólitíka nasionál ministeriu nian,” deklara nia.

Kona-ba dadus lisensiatura ne’ebé gradua ona husi tinan 2002 to’o ohin loron, ministru ne’e dehan, iha kuaze lisensiadu na’in 70.000.

ba sira ne’ebé serbisu ona no seidauk hetan serbisu, ministru ne’e dehan, nia parte seidauk iha dadus ba ida ne’e.

“Ba oin ministériu ne’e sei kria planu estatistika kona-ba graduadu sira iha Timor laran tomak hodi hatene ema hira mak hetan serbisu, hira mak seidauk, tanba ministériu ne’e foun, maibé la’o neneik sei to’o,” nia dehan.

Ministru ne’e dehan, governu konstitusional daualu iha obrigasaun atu hadia kualidade ensinu superiór nian, tan ne’e presiza kria kondisaun atu garantia rekursu umanu ne’ebé kualifikadu hodi bele hataan ba nesesidade nasaun nian.

“Timor Leste atu sustentavel presiza investe iha edukasaun ida sustentavel,” nia hatete.

Lisensiatura 50% mak sai Dosente

Tuir dadus husi Ministériu Ensinu Superiór, Siensía no Kultura dosente ne’ebé daudauk ne’e hanorin iha ensinu superior kuaze porsentu 50 mak ho nivel edukasaun lisensiatura.

“Ita hotu hatene dosente 50% iha ensinu superiór ho grau lisensiatura,” dehan ministru Longuinhos.

Atu garantia kualidade ensinu superior, ministru ne’e dehan, ba oin governu sei hasa’e grau akademika dosente sira liu husi fundu dezenvolvimentu kapitál umanu hodi bele investe rekursu umanu.