Deputada Bankada CNRT, Carmelita Caetano Moniz hateten, Prezidente Tribunál Rekursu nia saúde la di'ak liu ona atu ezerse nia funsaun, liu-liu ba kaer podér desizaun iha rai ne’e.

“Ita la espera ho kondisaun hanesan ne’e ezerse nafatin nia funsaun ho knaar ne'ebé todan tebetebes ne’e,” dehan nia, iha Plenária Uma Fukun PN, horisehik.

Haree ba atestadu médiku nian, nia dehan, Konsellu Superiór Majistratura foti desizaun liu husi rezolusaun 27 Juñu 2016 hodi halo suspensaun servisu durante fulan neen hodi halo tratamentu saúde. Bainhira rekupera ona bele fila-fali asume knaar. Maibé, PTR mós la hakru'uk hodi hala’o nafatin nia knaar.

Ne’e duni, husu ba Prezidente Repúblika ne'ebé iha knaar hili PTR, atu haree fila-fali ninia kondisaun ne’e sei bele kontinua asume ninia knaar, tanba bele fo implikasaun ba desizaun no deklarasaun sira ne'ebé fó sai.

Deklarasaun hanesan mós hato'o husi Prezidente Bankada CNRT, Natalino do Santos.

Nia dehan, timoroan jurista barak tebes, tanba ne’e Prezidente Repúblika tenke uza ona ninia podér hodi hodi suspende ona PTR nia servisu hodi substitui ema foun.

Tuir nia, ne’e sei fó imajen la di'ak ba públiku iha rai laran no rai li'ur, tanba ema bele kestiona jurista timoroan iha nasaun ne’e hodi dependente ba ema ida de'it.

Nia mós husu ba atu halo investigasaun ba kustu ne'ebé uza hodi ba halo tratamentu ne'ebé deskonfia hetan husi fatin rua hanesan husi Ministériu saúde no Tribunál Rekursu rasik.

Entretantu, Deputadu Francisco Branco hateten, junta médiku PTR nian bele loke diálogu ruma balu hodi tau pontu finál ba situasaun ne’e.

Hanesan reprezentante povu iha uma fukun ne’e labele permite atu situasaun ne’e alastra, tanba nia estadu psikolojia mós pertubradu ona. Estadu ne’e nia dignidade aas no folin ne'ebé boot. Sira ne'ebé iha Estadu ne’e reprezenta órgaun soberania tenke kuidadu didi’ak labele hamonu estadu nian dignidade.

Entretantu, antes ne’e Prezidente Tribunál Rekursu Guilhermino da Silva hateten, maski ninia kondisaun fíziku hanesan ne’e, maibé la fó impaktu ba ninia servisu.

“Ha'u nia fíziku bele defisiénsia maibé kakutak la defisiénsia,” tenik nia foin lalais ne'e.

Nune’e, nia esplika, atu troka ninia pozisaun ne’e desizaun husi Prezidente Repúblika, tanba ne’e bainhira iha ona desizaun husi Xefe Estadu nia prontu atu kumpre.