Sekretariu Jeral Konferensia Episkopal Timorense, Carlos Miguel Ruben, liu husi konferensia imprensa hatete, nuudar Timor oan no sarani katólika kaer metin nafatin ba ita nia identidade relijiosa no cultural no tane aas valor no dignidade matrimonio tuir hanorin Igreja katólika nian.
Nia dehan, relasiona ho divulgasaun informasaun husi media sira kona ba kasamento sivil husi ema nain rua sexo hanesan inklui Timor oan ida, iha Darwin Austrália. Informasaun nee sai viral iha loron Domingo, 21 de Julho 2024, hodi hamosu ona diskusaun publika.
Igreja Katólika nia papél nudar inan no mestra, fiél ba nia fundador Jesus Kristu hatuur nia án nudar hun no rin ba lialos, simu fiar atu fo moris ba nia oan sira, hanorin no hatudu dalan ba sira.
“Nudar inan, Igreja hadomi, simu, tau matan, hakuak no acompanha Maromak nia oan hotu la haré ba kor, rasa no jéneru. Nudar mestra, nia hatur án iha we matan inan tolu fiar Igreja Katólika nian nebe la maran, nee mak: Sagrada Escritura, Santa Tradisaun no Magistério.” dehan Sekretariu Ezekutivu iha CET Bidau Mota-klaran, Sesta (26/07)
Sekretariu ezekutivu nee hatutan, ema ida-idak feto ho mane tenke rekoñese no simu nia identidade sexual tanba nee hanesan grasa ida husi Maromak no labele reduz nia identidade sexual baseia deit ba nia inklinasaun ka orientasaun sexual desordenada.
“Ema ida-idak independentemente husi ninia orientasaun sexual, mesak Maromak oan neebe ita tenke respeita tuir ninia dignidade, ita buka evita hahalok oi-oin nebe discrimina no lori ba violensia,” katak Padre Carlos
Padre Carlos salient tan katak, relasiona ho vizita Santo Padre Francisco nia mai Timor-Leste, Amo Bispo sira konvida família sira hotu atu prepara án ba hasoru Amo Papa nudar peregrinasaun espiritual ida família nian: aman, inan no oan sira sei lao hamutuk, hodi ba simu Bensaun Apostólika husi Amo Papa.