Naimori deklara rasik kestaun ne’e bainhira hala’o abertura ba kampaña eleitoral kandidatu númeru 9 ne’ebé realiza iha kampu fetebol, Ainaro villa, munisipiu Ainaro.

Naimori hatete, maske nia feen Armanda mak kandidata an maibé bainhria manan iha eleisaun prezidensiál hodi kaer ukun, nia mak sei kaer volante hodi hadia povu nia moris.

“Di’ak liu Berta mak kandidata an mais ema ida atu regula nia ha’u rasik mak sei kaer volante hodi hadia nasaun ne’e no povu nia moris bele hakmatek tuir sidadaun ida iha rai ida ne’e,” deklara Naimori, Kuarta (02/03).

Nia hatete, nia mós aprende ona politika iha Timor-Leste no nota politika uluk ho agora la hanesan ona katak uluk ema boot sira uza gravata, la simples hanesan povu nia oan.

Nia hatutan, Timor-oan sira presiza fuan ba fuan hodi hakbesik no hatene hakoak nia povu.

Ho razaun ne’e, Naimori dehan, matak malirin ne’ebé Berta simu husi uma-lisan Bukar no foho Ramelau nian akompaña nafatin hodi haree ba nasaun ne’e nia di’ak iha futuru.

“Tanba ne’e mak ha’u rasik, Konseleiru, atu halibur Timor-oan, mesmu unidade nasionál ema koalia tiha ona mais implementasaun seidauk iha, só Khunto mak halo unidade nasionál, la haree ba kór no rasa, iha kualker saida de’it,” Naimori deklara.

Tan ne’e, nia apela ba povu tomak atu hili nia feen, Berta, ne’ebé kompete ho kandidatu na’in 15 seluk, hodi bele manan iha eleisaun prezidensial ba tinan ida ne’e.

Iha fatin hanesan, Prezidente Ekipa Susesu Nasionál, Marito Magno, iha konfiansa katak Berta sei tama ba ronda daruak.

“Sira sei la manan iha primeira ronda, segunda ronda ita sei tama,” dehan nia.

Nia dehan, Berta nu’udar lider ida ne’ebé servisu ho nonook no hatudu rezultadu iha ninia asaun. Ida ne’e prova ona bainhira nia asume kargu nu’udar Ministra Solidariedade Sosial no Inkluzaun no Vise Primeira Ministra.

“Programa barak mak ita-nia kandidata halo ona ne’ebé ita-boot sira mak sei sente, tanba dala-ruma ema dehan ita la matenek mais matenek la halo buat ida ne’e hanesan de’it, mais nonook halo servisu ne’e mak di’ak,” dehan nia.

Hametin Soberania Estadu

Kandidatura PR husi Partidu Khunto, Armanda Berta dos Santos hatete, bainhira povu fó konfiansa ba ba nia sai Prezidente Repúblika nia sei hametin soberania estadu.

“Bainhira povu fó fiar ha’u  sei servisu maka’as ho parte hotu-hotu hodi bele garante, hametin estabilidade politika interna no externa, liu husi funsionamentu estadu ne’ebé forte iha dezenvolvimentu hodi promove dialogu nasionál no internasional nu’udar komandante supremu,” dehan nia iha ninia kampaña.

Bainhira eleitu, nia hatete, nu’udar Xefe Estadu nia iha misaun mak promove dialogu iha rai laran no rai li’ur no hametin estadu direitu.

“Hanesan Xefe Estadu nu’udar simblu unidade nasionál ha’u sei buka atu promove dialogu bainhria mosu diverjensia politika, tanba nu’udar xefe estadu ha’u garante  sei laiha diskiminasaun politika pasadu nian ba kualker sidadaun hotu,” deklara Berta.

Tan ne’e, nia hatutan, promove unidade nasionál sei sai ajenda prinsipal ba nia  nu’udar PR durante mandatu tinan lima.

Aleinde ne’e, Berta hatete, nu’udar PR nia sei hametin relasaun diplomatika ho nasaun membru CPLP ne’ebé sai nu’udar meius importante ida atu mostra TL nia ezitensia iha mundu internasional, liu husi kooperasaun oioin ne’ebé TL halo tiha no buka atu bele hametin di’ak liu  tan hodi bele responde kualker issu internasional.

Juventude KHUNTO Garante Vitoria

Juventude Partidu Khunto Ainaro fó garantia katak sira-nia kandidatu PR sei manan iha eleisaun prezidensial.

“Ita hotu sente ona di’ak ka la di’ak, ita-nia votus dala-barak ona fó ba ema mais nunka konsidera, ne’ebé Ainaru, tempu to’o ona ita-nia inan Berta sai Prezidente, ita-nia futuru sei di’ak,” deklara;ara Prezidente Juventude Partidu Khunto, Jaimito Soares Missa.

Reprezenta feto Ainaro, Lucia jesus da Costa hatete, feto Ainaru luta hela maibé aman sira haluha ona sakrifisiu ne’ebé durante ne’e halo, nune’e tempu agora tenke hili Ainaro-oan rasik.

“Keta haluha feto Ainaro-oan, lori ita-nia inan Berta ba iha palasiu prezidente tanba ita hili ema seluk sei la konta ita-nia susar,” dehan nia.

Prezidente Ekipa Susesu Nasionál Marito Magno reforsa, tempu too povu Ainaru sira tenke hili nia ema rasik atu sai ba Prezidente Repúblika.

“Hanesan Ainaru-oan ita tenke vota Armanda Berta, 100% vota ba ama seluk ne’e imi lakon, tanba nia (Berta) sai Prezidente Republika sei mai fali Ainaru, hatudu katak tempu to’o ona Ainaru-oan ida sai Prezidente Republika,” deklara nia.