Presidente Repúblika, Fransisco Guterres Lú Olo hatoo nia mensajen liu husi nia Xefe Casa Sivil Francisco Maria de Vasconcelos ba asembleia jerál Igreja Protestante Timor-Leste (IPTL) ba dala-8, tersa (27/10), iha Aileu.
Nota komunikadu ne'ebe Online INDEPENDENTE asesu, tersa ohin Xefe Estadu hateten, sosiedade moderna ohinloron nian hatudu patrimóniu sosial kulturál ho diversidade.
Iha Timor-Leste ita iha grupu étniku kulturál oin-oin, ho relijiaun oin-oin, lian oin-oin no padraun oin-oin.
Ita moris ho diversidade kultural husi kedas tempu beiala sira-nian. Ita hetan mós influénsia oin-oin husi ema mai husi rai-li’ur. Tanba ita hatene respeita valor, ábitu no atitude oin-oin husi grupu oin-oin, ita ida-idak hariku liután ita-nia an rasik no ita-nia sosiedade.
Igreja Protestante Timor-Leste, ohinloron ho fiar-nain rihun sanulu resin rua iha Timor-Leste tomak, halibur ohin. Ha’u fiar katak iha Asembleia Jeral ba dala ualo ne’e, iha Aileu, IPTL sei sai forte liután, nu’udar instituisaun espiritual ida iha Timor-Leste, ne’ebé hametin ho ninia hakarak rasik maibé kontribui mós ba dezenvolvimentu Timor-Leste.
Ha’u hatene, katak hanesan instituisaun sira seluk, IPTL mós ajuda kuda no hametin valores no prinsípius ne’ebé kontribui atu hametin domin, solidariedade, pas iha ita -nia sosiedade.
Liuhusi Fundasaun Sosial Naroman, maluk sira husi IPT, sai ohinloron parseiru dezenvolvoimentu ida mós ba Governu Timor-Leste tanba kontribui ho:
- Klinika saúde iha Lautém no Manufahi
- Eskola hahú husi nível infantil to’o Sekundáriu iha Munisípius Aileu, Dili, Liquiçá no Oecusse.
- Fó mós formasaun ba hortikultura no ba área seluk, iha Liquiçá no Hera.
Ha’u mós hatene katak Fundasaun Sosial Naroman, iha tempu luta libertasaun nasional, haruka ai-moruk ba FALINTIL.
Konstituisaun RDTL, artigu 45, garante liberdade atu hanorin no pratika konfisaun relijioza ne’ebé de’it. Ita-nia Kontituisaun la fó dalan atu halo perseguisaun ka hasees ema ida tanba relijaun.
Prezidente Repúblika konta nafatin ho apoiu husi IPTL, nu’udar instituisaun ida ne’ebé sei kontribui nafatin ba área edukasaun, saúde no agrikultura atu ajuda hasa’e ita-nia kapasidade iha rekursus umanus no hasa’e ita-nia kbiit atu halakon kiak iha Timor-Leste.
Liuhusi ezemplu rasik, líder no maluk protestante sira sai mós profesór ba aspetu importante ba ita-nia sosiedade hanesan toleránsia, respeitu ba direitus umanus no hanorin kona-ba sidadania, rekoñese no valoriza diversidade kultural atu ita timoroan labele halo diskriminasaun ba malu.
Timor-Leste sei hariku-an babeibeik ho fiar oin-oin, ábitu no kostume oin-oin. Biar ho diferensa, ita hotu sei kontinua nafatin fó liman ba malu atu hametin liután polítika inkluzaun sosiál. Katak ema ida-idak iha ninia valór rasik no hothotu importante ba Timor-Leste.
Eventu ne’e halibur fiar-nain barak no ha’u fiar katak maluk sira sei haktuir medidas prevensaun hodi hasees-an husi Covid-19.
Susesu ba Asembleia Jeral IPTL ba dala ualo!
Obrigado wain!
