Partido istóriku hetan primeira lugar ba eleisaun parlamentar periodu 2017-2022 ne’e hetan votus 168,422 (29.65%), CNRT votus 167,330 (29.46%), PLP lidera husi Taur Matan Ruak hetan votus 60,092 (10.58%), Partido Demokratiku votus 55,595 (9.79%) no partido KHUNTO votus 36,546 (6.43%).
Ne’e duni, haree ba rezultadu provizoria ne’e partidu FRETILIN hetan kadeira iha Parlamentu Nasional hamutuk 23, CNRT 22, PLP 8, PD, 7 no KHUNTO 5.
Haree husi numeru kontajen votu, partidu FRETILIN hahu hetan konfiansa husi eleitor sira. Husi periodu ba periodu votu partidu FRETILIN nian kontinua sa’e hanesan iha 2007 hetan votu 120.592 no iha 2012 hetan 140.786. Nune’e, iha periodu ne’e sa’e tan ba votu 168,422.
Nune’e, partidu CNRT ne’ebé ukun ona tinan sanulu ninia votu la estatis tanba iha 2007 hetan votu 100.175 no iha 2012 hetan 172.831, maibe iha eleisaun ne’e tuun ba 167,330.
Partido Demokratiku, iha 2012 hetan votu 48,851, maibe iha eleisaun ne’e sae ba votus 55,595 (9.79%), maski nia kadeira iha Parlamentu Nasionál menus husi 8 tuun ba 7, bazeia ba votantes tuir bareira 4 pursentu iha periodu eleisaun parlamentar tinan ida ne’e.
Partido FRENTE Mudansa ne’ebé iha 2012 hetan kadeira 2 iha Parlamentu Nasionál ba periodu 2017-2022 la hetan asentu (mamuk).
Partido KHUNTO ne’ebé iha 2012 la hetan asentu iha Parlamentu Nasionál, iha tinan 2017 hetan kadeira 5 iha Parlamentu Nasionál.
Entretantu, PLP lidera husi Taur Matan Ruak maski foin kompete iha eleisaun parlamentar tinan ne’e, nia hetan kadeira 8.
Haree husi rejultadu tuir dadus STAE ne’e, hatudu katak FRETILIN iha tinan 2012 hetan kadeira 25 tuun ba 23, CNRT uluk 30 tuun ba 22, PD uluk 8 tuun ba 7, no FRENTE Mudansa tuun ba mamuk.
Husi total munisipiu 12 inklui Rejiaun Autonoma Espesial Oekusi-Ambenu (RAEOA), partidu CNRT manan iha munisipiu sia (9) hanesan Aileu, Ainaru, Bobonaru, Covalima, Dili, Ermera, Likisa, Manatutu no Manufahi. Nune’e, partidu FRETILIN manan makaas iha munisipiu tolu (3) no RAEOA hanesan Baukau, Lautem, RAEOA no Vikeke.
