Nune’e, lider na’in rua ne’e ko’alia uitoan ona kona-ba hamutuk hodi formasaun governu VII Governu Konstitusionál.
Liu husi konferénsia imprensa, Sekretáriu Jerál partidu FRETILIN, Mari Alkatiri deklara ona katak sei loke dalan nafatin atu hakuak ema hotu-hotu, liuliu Xanana Gusmão.
“Ha'u hakarak garante, partidu FRETILIN sei loke dalan nafatin atu hakuak hotu-hotu, liu-liu FRETILIN sei servisu nafatin ha’u nia maun Xanana Gusmão”, dehan nia, iha Sede Comite Central FRETILIN (CCF), Komoro-Dili, horisehik.
Alkatiri dehan, FRETILIN la sente nia-aan manan mesak, tanba iha kampaña rasik hatete ona bainhira FRETILIN manan Xanana mós manan no fundadór sira hotu manan.
Tanba ne'e, atu FRETILIN hatuur nia maturidade, Sekjer FRETILIN hateten, militante no kuadru FRETILIN ninian bele hatudu maturidade atu bele sai ezemplu ba povu tomak.
“Ita haree saida maka ita hatene ona, katak iha rai TL ne'e iha partidu rua boot, maibé husi 2012 too 2013 mai deside servisu hamutuk atu garante estabilidade no pás ba rai TL”, tenik Alkatiri.
Atu loke dalan ba dezenvolvimentu, Sekjer FRETILIN dehan, partidu ne'e maka FRETILIN ho CNRT, hakarak ka lakohi iha eleisaun ida-idak tuir nia dalan no ida-idak buka atu lori nia programa tun ba povu atu konvense ba povu atu fó votu.
Maski nune’e, tuir nia haree iha eleisaun ne’e povu maka manan, tanba povu fahe votu ne’e atu la fó dalan ba partidu ida mesak atu ukun.
“La’ós dehan la fó, maibé labele fó maioria absoluta ba partidu ida ne'ebé de’it, tanba ne'e ita nia povu maka manan no ema hotu tenke respeita vontade ida povu ninia”, dehan nia.
Eis-Primeiru Ministru, Mari Alkatiri hateten, FRETILIN manan maioria simples, maibé FRETILIN hatene katak saida maka povu hein husi FRETILIN.
Atu iha kapasidade atu fila fali ba valór no prinsípiu FRETILIN nian, hodi halibur ema hotu-hotu ne'ebé bele partisipa prosesu dezenvolvimentu, atu hasai povu husi ki’ak no husi mukit.
“Tanba ne’e, ami kompete manan, maibé antes manan kontente liu, tanba ha'u simu mensajen ne’e husi povu atu tenke servisu hamutuk”, dehan Alkatiri.
Tuir ninia preferénsia ba governu koligasaun ho partidu ida ka rua no servisu hamutuk ho Xanana tinan rua tinan tolu resin no koñese malu uluk kedas hanesan amigu no parseiru iha servisu, maibé primeiru parseiru maka eskolla Xanana nafatin.
Nia dehan, iha tempu kampaña sira ko’alia buat barak, maibé hotu tiha hanoin ba povu ne'e no ba rai ida ne'e nia pozisaun, saida mak di’ak atu serve povu di'ak liu.
“Ha’u fiar katak Xanana sei hatene duni katak, nia serve povu ida ne’e, rai ida ne’e tenke ativu iha ezekutivu labele sai de’it opozisaun”, tenik Mari.
Tanba demokrasia nune’e duni hanesan ba jogu ida durante kampaña, maibé liu ona agora tenke hamutuk fali lori rai ida ne’e ba oin.
Maski nune’e, nia dehan, bolu sira hotu entaun demokrasia mate ona, entaun labele bolu hotu dala ida, maibé sei ko’alia hotu-hotu atu diskute didi’ak FRETILIN nia governu ne’e atu halo sai nusa, ukun sai programa saida ne’e obrigasaun atu esplika ba partidu hotu-hotu.
“Ha’u fó obrigadu ba povu tomak, tanba akompaña prosesu kaer kampaña ne’e la’o ho hakmatek hatuur nia maturidade laiha violénsia akontese rua ka tolu, maibé ne’e normál”, dehan nia.
Ne’e duni, nia husu husu atu kontinua hanesan ne’e husi ne’e ba oin la'ós de’it governu foun atu tama maibé husi ne’e ba oin tenke partisipa nafatin prosesu dezenvolvimentu bainhira povu la partisipa povu sente katak povu benefesia de’it entaun se maka halo dezenvolvimentu povu tenke partisipa liu-liu joven sira tenke partisipa atu dezenvolvimentu ne’e bele akontese se lae se maka atu halo loos.
