Maski nune’e, Xefe Governu, Mari Alkatiri, otimizmu katak VII Governu Konstitusionál sei dura to’o tinan lima (5).

Nia dehan, governu ne’e forma ho dezafiu lubuk oioin no governu mai ho prinsípiu no programa ne’ebé sei implementa tuir planu no alvu.

“Ha’u la halo milagre, maibé ha’u garante governu sei dura too tinan lima”, dehan primeiru-ministru timoroan, Mari Alkatiri, hafoin simu pose iha Palasiu Nobre Lahane-Dili, horisehik.

Nia hatutan, VII Governu mai ho programa prioridade rua halo dezenvolvimentu institusionál liu husi halo reforma iha instituisaun Estadu no governu kontinua hametin ninia lasu kooperasaun internasionál.

Kona-ba kompozisaun VII Governu ne’ebé seidauk kompleta, Alkatiri dehan, governu ne’e sei kontinua loke odamatan atu halo negosiasaun nafatin ho partidu CNRT, PLP, no KHUNTO hodi bele tama iha estrutura governu ne’e.

“Governu mai ho membru governu na’in 11 atu forma governu ne’e. Maibé, ne’e mós la fasil. Segundu sei iha esperansa atu hetan tan partisipasaun hosi partidu sira seluk”, tenik nia.

Nia dehan, iha estrutura VII Governu mai ho kompozisaun membru governu hamutuk ema na’in 30, no sei falta tan membru governu na'in 19 hodi kompleta.

Tuir nia, FRETILIN maka manan, maibé hakarak governu inkluzaun, koligasaun ho insidénsia parlamentár nu’udar prinsípiu fundamentál atu forma governu ida metin liu no buras liu.

Nia hatutan, mezmu governu ne’e simu ona pose hanesan Xefe Governu, Alkatiri sei laran metin hodi konvida lider partidu opozisaun atu partisipa iha estrutura governu ne’e.

Alkatiri dehan, bainhira governu ne’e metin, dezafiu boot ne’ebé governu sei hasoru mak atu implementa programa no lori dezenvolvimentu ne’ebé povu bele hetan rezultadu di'ak hodi sai neineik husi mukit no kiak.

“Dezafiu maka tinan tolu ka tinan haat ita bele muda povu nia moris atu hetan di’ak liu”, nia hateten.

Entretantu, iha parte seluk, Alkatiri dehan, VII Governu sei halo uluk planu dezenvolvimentu, institusionál nian hanesan reforsa kapasidade administrasaun no jestaun rekursu iha orsamentu no rekursu umanu.

Alende hametin kooperasaun internasionál, Alkatiri sita katak, Timor tenke loke liras hakbesik aan ba mundu tomak hodi kria liña kooperasaun oioin ne’ebé sei fó benefísiu ba dezenvolvimentu Timor-Leste.

“Ita buka hametin nafatin kooperasaun ho ita nia amigu sira ne’ebé iha no amigu foun sira”, dehan Alkatiri.