Prezidente Repúblika, Francisco Guterres ‘Lú-Olo’ garante VII Governu Konstitusionál sei metin no sei hala’o ninia knaar tomak to’o tinan lima mezmu ho Governasaun minoritária.

“Ha'u fiar ho laran tomak katak VII Governu Konstitusionál ne’ebé hahú ohin hala’o knaar sei metin no sei hala’o sira-nia knaar tinan lima tuir mai”, dehan Xefe Estadu iha ninia diskursu iha sesaun Solene Uma Fukun Parlamentu Nasionál (PN) Sesta (15/09).

Lú-Olo fiar tanba deputadu sira sei kaer metin nafatin sira nia responsabilidade nu’udar reprezenta ba povu rai doben ida ne’e.

Nia akresenta, povu ida ne’e hakarak moris iha pás no estabilidade, liuliu kondisaun ne’ebé importante tebes hodi halo dezenvolvimentu no halakon pobreza.

“Timor-Leste nunka hasoru krize institusionál no sei la hasoru, tanba hotu-hotu iha maturidade polítika, ita hotu iha sentidu Estadu”, dehan nia.

Ne’e duni, lider hotu-hotu tenke respeita vontade povu ninian liu husi eleisaun demokrátiku ne’e. Tanba Parlamentu Nasionál mak órgaun Estadu ho responsabilidade boot liu atu kaer metin estabilidade polítika no governativa ba VII Governu durante tinan lima tuir mai.

Estabilidade ne’e, Lú-Olo dehan, depende husi ema hotu-hotu, maibé liuliu mós husi votu konfiansa husi Parlamentu Nasionál ne’e.