Prezidente Parlamentu Nasionál, Aniceto Guterres hateten, governu ne’e avansa ho minoria parlamentár. Ne’e duni, kuandu partidu polítiku sira hakarak hamonu governu koligasaun, vota kontra programa no orsamentu estadu. Bainhira governu ne’e monu sei hakat ba eleisaun antesipada.

“FRETILIN la ta'uk ida ate la la’o ho PD. FRETILIN la’o mesak mós avansa, tanba konstituisaun mós bele fó dalan forma governu minoria. Fiar katak partidu hotu-hotu hakarak atu rai ne’e la’o ba oin la'ós atu marka pasu, ita atu ba kotuk fali”, dehan Aniceto, iha Uma Fukun PN, Sesta (15/9).

Nia hatutan, partidu polítiku sira tanba kargu no podér dada malu, maibé ba eleisaun antesipada laiha benefísiu ba povu, tanba foin lalais mak povu husik liu eleisaun.

“Imi tau hela FRETILIN ba rai naruk dudu monu. FRETILIN sei dada partidu hotu, ita sei monu hotu”, nia reforsa.

Nia hatutan, partidu polítiku sira ne’ebé hetan asentu iha Parlamentu Nasionál hakarak atu hamonu governu vota kontra programa governu no orsamentu, maibé ne’e la'ós dalan ne’ebé di'ak. Tanba ne’e, buka dalan atu halo diálogu nafatin hodi bele entende malu hodi foti aas interese nasionál.

Nia hatutan, atu lori povu ida ne’e sai husi kiak no mukit tenke tau aas interese povu nian, labele tau fali interese lider partidu ka deputadu ida nian. Bainhira la hetan kadeira ruma halo governu ne’e monu atu bele ba hala’o eleisaun antesipada.

Maski nune’e, Prezidente Parlamentu Nasionál garantia katak sei la akontese eleisaun antesipada, tanba prosesu sira ne’e hanesan ezersísiu ida atu bele kontinua diálogu ho partidu sira seluk ho onestidade.