Tuir fonte informasaun Jornal INDEPENDENTE nian, Xanana to’o iha Manatutu, Tersa (18/6), meiudia, hodi partisipa eventu jogu basket bol Taxa Rentau ba komemorasaun Loron Santo Antonio.
Iha Manatutu, Xanana mós envolve mós jogu esebisaun hamutuk ho ekipa Veteranu Team joga kontra Ekipa Padre sira nian ho rezultadu 19:29. Iha ne’ebé, Ekipa Padre sira nian maka sai manan iha jogu esebisaun ne’e.
Tuir fonte ne’e, Xanana halai iha kampu laran durante kuaze minutu ualu (8) nia laran de’it.
Lider sira seluk ne’eb’e partisipa mós iha eventu ne’e maka Embaixador Timor-Leste ba Indonezia, Alberto X. P Carlos.
Alkatiri Triste
Prezidente Autoridade Rejiaun Administrativa Espesiál Oe-cusse Ambenu (RAEOA) no Zona Espesiál Ekonomia Sosiál Merkadu (ZEESM), Marí Alkatiri, sente triste tanba, Kay Rala Xanana Gusmão, la partisipa iha serimónia inaugurasau ba Eeroportu Internasionál “Rota do Sândalo”.
Aeroportu ne’e ofisialmente hetan inaugurasaun husi Prezidente Repúblika (PR), Françisco Guterres Lúolo, Tersa (18/06), iha ne’ebé marka mós prezensa husi eis-Xefe Estadu, José Ramos Horta, no mós órgaun soberanu sira.
“Ohin ha’u nia laran triste oituan, tanba ha’u nia irmaun Xanana Gusmão laiha ne’e, ha’u katak, nia (Xanana-read) biar laiha Oekusi agora, ha’u fi’ar nia biar iha Díli ka iha fatin seluk nia akompaña hela tranzmisaun direta ida ne’e,” dehan Alkatiri, iha ámbitu komemorasaun aniversáriu estabelesimentu RAEOA no ZEESMba dala lima no inaugurasaun ba Aeroportu Internasionál “Rota do Sândalo”, Palaban Oekusi, Tersa (18/6).
Alkatiri hatutan, nia parte iha koñesimentu kona-ba auzensia Xefe Governu, Taur Matan Ruak, iha serimónia inaugurasaun nee.
Iha fatin hanesan, Premiadu Nobel da Páz, José Ramos Horta, hato’o votu felisitasaun ba eis PM Xanana Gusmão no prezidente autoridade RAEOA-ZEESM, Marí Alkatiri, tanba prosesu dezenvolvimentu ne’ebé oras ne’e dadaun la’o iha Oekusi sira mak hahú.
Nia dehan, istória Timor-Leste nian liu husi PN, liu husi rezolusaun dalarua, kona-ba lei fundu minarai no RAEOA, nune’e Xanana Gusmão depozita konfiansa ba Marí Alkatiri hodi lidera RAEOA-ZEESM atu kore povu Oekusi husi ki’ak no mukit.
Tanba ne’e, Horta apela ba Xanana Gusmão no Marí Alkatiri, tenki servisu hamutuk nafatin, atu bele kore povu husi susar no terus.
Nia hatuatn, Estadu Timor nia orbigasaun mak tau ona infraestrutura iha RAEOA, ne’eduni presiza buka tan investimentu privadu.
