Karta ne’e hatutan, iha reuniaun ne’e, estrutura superior CNRT sira haree ba seriedade kestaun ne’ebé mosu iha enkontru alargada (Konferensia) AMP ne’ebé hala’o iha loron 15 to’o 16 Juñu.

“Partidu CNRT sente katak iha obrigasaun atu hatan kedas ona ba dúvidas ne’ebé karik bele mosu, iha sosiedade Timorense nia laran”.

Iha karta ne’e, CNRT hato’o ninia pozisaun lamenta tanba konsidera Prezidente Repúblika Francisco Guterres Lu Olo falta sentidu estadu tanba seidauk fó pose ba membru governu pendente ne’ebé maioria mai husi partidu CNRT.

“Partidu CNRT lamenta falta de sentidu-de-Estadu husi Prezidente Fretilin ne’ebé asume hela mós de jure funsoens hanesan Prezidente RDTL,” deklara estrutura superior CNRT liu husi komunikadu ne’e.

Kandidatu membru governu ne’ebé PR Lu Olo deside hodi pendente mak Francisco Kalbuadi Lay, Helder Lopes, Virgilio Smith, Jacinto Rigoberto, Tomas Cabral, José Turquel, Amandio Benevidas, inklui Xanana Gusmão no Antonio Verdial ne’ebé  rejigna aan ona.

Aleinde kona-ba kandidatu membru governu pendente, CNRT mós deklara la simu ho inersia autór judisiariu relasiona ho rezultadu auditoria Kamara Kontas ba RAEOA.

“Partido CNRT hato’o ninia preokupasaun kle’an ba inérsia, katak la book-aan no nonok hela de’it, ne’ebé ita labele simu, husi atores judisiarius balun, kona-ba faktus ne’ebé hotu-hotu hatene momoos tiha ona ba ‘delapidasaun’ ka haktohik, hamenus, halakon, dezenas de milhoens de dólares ba ‘fundu soberanu’, hanesan prátikas kontrárias ba ‘bem-estar nasaun no povu Maubere nian’, tuir auditoria Câmara de Contas iha RAEOA, ba períodu 2014-2015, nebé loke tiha ona ba públiku.”

Enkuantu, karta ne’e hatutan, eis membru governu husi governasaun ne’ebé lidera husi CNRT tama ona prizaun tanba halakon osan estadu ne’ebé la liu rihun $10.

“Defisil tebe-tebes ba Partidu CNRT atu halakon tiha ninia sentimentu angústia ka triste ho susar kona-ba ninia persepsaun ka ninia haree ne’ebé sai daudauk ona hanesan konviksaun ida, katak atores jusdisiarius hirak ne’e lakohi duni defende justisa ‘em prol do bem-estar nasaun nian no povu Maubere nian’, maibé …… alienadu ka influensiadu tiha ona husi intereses boboot partidu politiku ida nian no ninia lider sira ne’ebé, afinal, simu ona, ho malorek hela, sertidaun ba impunidade total,” karta ne’e akuza.

Iha karta ne’e, CNRT mós la direitamente hato’o ‘resposta’ ba rezultadu enkontru alargada partidu FRETILIN iha 8 Juñu foin lalais ne’ebé hatete “; FRETILIN ezije  halo debate iha relasaun investimentu sira hanesan iha kosta sul”.

“Partidu CNRT rezeita ‘ezijênsia’ atu ‘hala’o debate kona-ba investimentus iha Kosta Sul’ husi ema sira ne’ebé bainhira hetan konvite ba debates hanesan ne’e la-ós de’it proíbe ka bandu tiha ninia seguidores ka ‘pengikut’ sira atu ba partisipa iha Centro Convenções Dili iha loron 8 fulan Dezembru tinan 2018, maibé akuza tan katak CNRT buka ‘halo pré-kampanha eleitoral’,” karta ne’ebé fó ‘resposta’ ba FRETILIN.

Iha karta FRETILIN asuntu seluk ne’ebé deklara mós mak “membru CCF dilebera mandatu ba Sekretariu Jeral FRETILIN Mari Alkatiri hodi halo dialogu ho lider nasional ba situasaun politika”.

Ba ida ne’e, maske la temi ho klaru, maibé CNRT deklara rejeita hanoin ba dialogu ne’ebé molok ne’e FRETILIN lansa tiha ona.

“Partidu CNRT rezeita dispozisaun ka hanoin atu ‘buka medidas ka solusoens estruturantes ka bele hatuur ba estadu’, tanba polítika ida ne’e iis fali ‘governu inkluzaun’ ne’ebé Prezidente FRETILIN, Doutor Lú Olo, ema ne’ebé mós sai Prezidente RDTL, foin daudauk fó sai tiha ona.”

Ho nune’e, KPN no KDN partidu CNRT deside la autoriza ninia lider sira atu halo inisiativa saida no oinsa de’it kona-ba dialogu.

“CPN ho CDN Partidu CNRT deside atu la autoriza ninia lider sira atu halo inisiativa saida ka oinsa de’it kona-ba dialogu ho see-see de’it tuir rezolusaun konjunta husi enkontru alargadu AMP nian iha loron 16 Juñu 2019”, deklara estrutura supeiro CNRT ne’e.