Komandante UPF, Superintendente João Belo dehan, atividade hatama mina ilegal nu’udar obstaklu boot ida ne’ebé mak UPF hasoru to’o ohin loron.

“Ami kontrola iha fatin ida ema hatama fali husi fatin seluk, ne’ebé ami arraska uitoan,” deklara nia iha Kuartel Jeral Polisia Nasional Timor Leste (PNTL), Kaikoli, Dili, Kinta (25/10).

Tuir nia, ema kontinua hatama minarai ilegal tanba governu la kria sistema di’ak atu hatama ho legal hodi bele sustenta komunidade sira ne’ebé presiza tebes minarai.

Durante ne’e, nia hatutan, UPF uza meius oioin atu kontrola atividade ilegal, maibé ema muda tun-sa’e fatin hodi hasees an husi kontrolu UPF nian.

“Minarai (ilegal) tama husi tasi agora dadaun maka’as. Hahú husi Palaka mai Loes, Maliana, Suai no Oekusi parte Oesilo,” dehan nia.

Maske nune’e, Komandante ne’e dehan nia parte kontinua esforsu hodi asegura fronteira husi atividade ilegal.

Tuir dadus, husi Janeiru to’o Outubru tinan ne’e, UPF konsege prende ona minarai ilegal hamutuk tonelada 36.

Entertantu, kona-ba rekursu umanu, Komandante ne’e dehan númeru membru UPF ki’ik liu kompara ho unidade sira seluk, tan ne’e membru ne’ebé koloka iha iha baze dala-barak la to’o tarjetu ne’ebé mak planeia.

“Kada postu ita iha de’it membru menus husi na’in 10. Distansia kontrolu kada postu tenke atinze kilometru 10. (maibé) Ita (UPF) koloka ema ida kada kilometru ida, ne’e defisil,” dehan nia.

Tan ne’e, nia husu atu aumenta númeru membru efetivu UPF nune’e bele apoiu di’ak liu tan servisu fronteia nian.