Fiar Matan-dook, Familia Rua Ataka Malu Featured

By Tome Amando Outubru 25, 2018 6580

DILI: Klaru katak fuan sei moras bainhira ema ne’ebé ita hadomi husik mundu. Maibé, atu oinsa mós tenke iha hanoin ne’ebé rasional bainhira atu deside buat ruma. Atu nune’e labele hamosu problema seluk ne’ebé la espera.

Kazu ne’ebé mosu entre familia rua iha Suku Santa Kruz bele sai lisaun. Familia rua ne’e ataka malu hafoin matan-dook sig katak membru husi familia ida mate tanba membru husi familia seluk mak halo.

Iha fulan kotuk, Jacinto dos Santos nia inan husik mundu. Tanba fiar katak nia inan mate la ho normal, familia hakat ba matan-dook hodi husu atu sig kauza ne’ebé halo Jacinto nia inan mate.

Matan-dook ne’ebé sira hasoru hatete katak Jacinto nia inan mate la’os tanba moras, maibé tanba ema mak halo. Lia-fuan ema halo ne’e refere ba Jacinto nia primu sira. Familia Jacinto mós fiar ba lia-fuan ne’e tanba durante ne’e familia rua ne’ebé hela besik malu ne’e haree malu la di’ak.

Fiar ba lia-fuan husi mata-dook ne’e boot liu tan tanba bainhira Jacinto nia inan moras, nia primu sira la mai haree.

Jacinto hahú halo planu atu halo asaun ruma, no iha Segunda (22/10), familia rua ne’e hahú provoka malu no da’et to’o Tersa (23/10).

“Iha Segunda lokraik familia rua ne’e baku malu to’o ida hetan kanek iha mata fukun. Sira besik atu oho malu,” informa sasin ida ne’ebé nu’udar mós viziñu husi familia rua ne’e, Paulo Evaristo ba jornalista INDEPENDENTE, Kuarta (24/10).

Hafoin kazu baku malu iha Segunda ne’ebé rezulta ema ida kanek, Polisia Eskuadra Na’i Feto halo atuasaun no kaptura joven ida husi familia Jacinto hodi detein iha sela polisia nian.

Iha Tersa maizumenus tuku 17:30, Jacinto hala’o viajen ba eskuadra polisia hodi haree nia primu ne’ebé detein. To’o iha eskudara oin, Jacinto hetan grupu husi familia ne’ebé sira problema ba, hamrik iha portaun oin. Balun kaer katana, martelu no fatuk.

Tanba haree situasaun la di’ak, Jacinto koko atu halai maibé nia hetan terinetik husi katuas ida, no Jacinto ne’ebé lori motor xoke katuas ne’e, nune’e sira na’in rua monu.

Hafoin monu, Jacinto hamriik hodi halai husik nia motor, maibé nia la konsege halai dook tanba hetan tuda no monu kedan ba rai.

“Nia (Jacinto) monu takarabat tiha ona ba rai. Ema sira ne’e lori fatuk boot riba ba nia ulun, ida seluk lori martelu baku nia ulun, ran nakfisik sai husi nia ulun, tilun no inus,” sasin husi Paulo.

Hafoin akontesimentu ne’e, vitima evakua kedan ba Ospital Nasionál Guido Valadares hodi hala’o tratamentu. Tuir informasaun, vitima iha ona sala ICU.

Entretantu, Komandante PNTL Dili, Superintendenti Xefe Pedro Belo hatete, maske suspeitu sira halai, maibé polisia halibur ona evidensia iha fatin akontesementu.

Nia hatutan, daudauk ne’e Polisisia Servisu Investigasaun Kriminal Eskudara Na’i Feto rekola informasaun atu haruka ba tribunal hodi husu mandadu detensaun ba suspeitu sira.

“Ita presiza dadus ida ne’ebé kompletu par tribunal fó karta madandu ba polisia. Ita presiza iha provas ida ne’ebé forte, se lae ita kaptura tiha suspeitu depois haruka ba tribunal laiha provas ida forte tribunal bele liberta fali sira,” dehan nia.

Rate this item
(0 votes)

Independente Digital TV