Polisia Nasionál Timor-Leste (PNTL) ezekuta orden ne’e hafoin simu mandadu kapturasaun husi Tribunál Munisipál Dili (TMD), iha Kinta (25/10).
Ezekusaun hala'o iha maizumenus tuku 08:00 dadeer OTL, hodi ba tula Borlaco iha nia uma Taibesi Likintae, nune’e ba halo rejistrasaun iha Estasaun Munisípiu Dili hafoin ba prizaun Bekora.
Diretór Nasionál Servisu Prizional, Hélder Cosme, hateten, sira simu ona dadur ida ho naran Francisco da Costa Soares ‘Borlaco’ ne'ebé entrega husi Polisia Munisípiu Dili, maizumenus tuku 08:25.
“Tratamentu ba dadur sira hanesan deit ho dadur sira seluk, nune’e laiha ida maka hetan tratamentu espesiál”, tenik nia, iha Kaikoli, Sesta (26/10).
Francisco Borlaco tama ba prizaun Bekora ba númeru 582.
Antes ne’e, iha tinan 2017 liu husi desizaun primeira instánsia TMD kondena Francisco Borlaco ho pena prizaun tinan hitu no selu indeminizasaun106.173,84.
Maski nune’e, defensór Borlaku hatama rekursu no desizaun Tribunál Rekursu konsege diminui pena prizaun ba tinan haat no mantein nafatin selu indenizasaun $106.173,84, ba krime partisipasaun ekonómika negósiu.
Tribunál Rekursu konsidera kondenadu Francisco envolve prosesu pagamentu ba konstrusaun ospitál referénsia Baukau, ne'ebé seidauk remata no kompañia abandona hela maibé halo ona pagamentu.
Hamutuk ho Francisco Borlaco, to’o oras ne’e eis-membru Governu ne'ebé tama ona prizaun hamutuk na’in lima kompostu husi eis-Ministra Justisa, Lúcia Lobato (livre ona), eis-Sekretáriu Estadu Obras Públiku, Domingos Caeiro, Eis-Ministru Edukasaun, João Câncio no eis-Sekretáriu Estadu Meiu Ambiente, Abílio Lima.
