Nune’e, tribunál mós husu ba arguida atu selu kustu judisiál hamutuk U$ 100.

Tribunál kondena arguida ho pena tanba konsidera faktu maioria provadu. Arguidu hanesan Vise-Ministra Finansas, iha tempu V Governu, halo pagamentu ba deklarasaun eis-Ministra Finansas, Emília Pires, iha média imprime sira. Ne’ebé deklarasaun ne’e laiha relevánsia ho servisu Estadu nian.

Tuir kronolojia, Emília Pires hasai deklarasaun kontra akuzasaun Ministériu Públiku ne'ebé akuza Emília ba kazu sosa kama ba Hospital Nasionál Guide Valadares (HNGV) iha média STL, INDENPENDENTE, Timor Post no Bisnis Timor hodi publika hanesan publisidade.

Arguida Santina iha momentu ne’e hatene hela publikasaun ne’e laiha ligasaun ho Estadu, tanba deklarasaun ne’e Emília halo auto-defeza ba problema privadu, maibé arguida kontinua aprova osan Estadu hodi halo pagamentu ba média sira ne'ebé publika ona deklarasaun ne’e.

Ho arguida nia-hahalok maka fó prejuizu ba Estadu ho valór $1.900, nune’e arguida provadu komete krime administrasaun neglijente.

Maibé, tribunál mós haree ba sirkunstánsia sira ne’e, arguida rasik devolve ona osan ne'ebé fó prejuizu ne’e antes prosesu ne’e mai tribunál.

Julgamentu ne’e prezide husi juisa Zumiaty Freitas, Ministériu Públiku reprezenta husi prokuradór Rogério Viegas, arguida hetan defeza husi advogadu privadu.