Tuir informasaun ne’ebé diariu ne’e asesu, Ministériu Públiku akuza arguidu viola Kodigu Penal (KP) artigu 314 kona-ba Krime Fraude Fiskal ho pena apstrata husi tinan 2 to’o tinan 6, no KP artigu 244 kona-ba Krime Dezobidensia ho ameasa pena prizaun tinan 3 ka multa.

Hafoin interogatoriu dahuluk, defeza husi arguidu, Juvinal Yohanes Freitas, informa tribunál foti desizaun fó medida kuasaun ba prizaun preventiva tanba tuir tribunál nia konviksaun arguidu hala’o nia atividade la ho lisensa.

Tribunál, nia hatete, konklui katak arguidu nia atividade fó prezuiju maka’as ba esatdu Timor Leste.

“Iha Tribunál nia despaxu Tribunál aplika pena prizaun preventiva ba arguidu hodi hein prosesu investigasaun,” dehan defeza.

Iha ninia deklarasaun, arguidu hatete, nia hala’o atividade taxi online ne’e hahú iha 5 Setembru 2018.

Maibé tuir faktus ka provas ne’ebé iha hatudu arguidu kleur ona hala’o ona atividade ne’e iha Timor Leste.

Enkuantu, defeza deklara la simu ho desizaun tribunal no sei halo rekursu durante loron 15 nia laran.

Entretantu, arguidu YSL hetan kapturasaun husi polisia bainhira hala’o ninia atividade tula pasajeiru iha area Timor Plaza, 9 Setembru 2018.

Polisia simu informasaun husi pasajeiru ida ne’ebé uza taxi online refere. Pasajeiru ne’e nu’udar funsionariu ida iha Dirasaun Nasional Transporte Terestre (DNTT).

Tuir Komandante Daruak PNTL Munisipiu Dili, Superintendenti Asistente Euclidis Belo, Xineza ne’e hahú hala’o atividade ne’e iha tinan 2017.

“Ami halo konfirmasaun uluk ho parte DNTT katak to’o agora seidauk iha lisensa ba taxi online husi Xina atu halo operasaun iha Timor Leste,” deklara Euclidis.

Komandante Daruak ne’e hatutan, taxi ne’ebé hetan lisensa husi DNTT atu hala’o operasaun mak taxi argo no taxi kinur (kooperativa).

“Laiha tan taxi seluk mak bele halo operasaun,” dehan nia.

Tuir diploma Ministérial Ministériu Transporte, Komunikasaun no Obras Públika artigu 3 nú.2 no nú.3 tinan 2003, hatete kualker transporte públiku ne’ebé atu halo operasaun tenke iha lisensa.

“Kuandu seidauk iha lisensa ne’e proibidu,” dehan nia.

Ba atividade Xineza nian, Eculidis hatete, ne’e konsidera nu’udar atividade illegal ne’ebé tama iha kategoria infrasaun tanba halo falsifikasaun dokumentus.