Vitima ne’e mai husi Munisipiu Aileu no durante ne’e hela iha Fatuhada hodi hala’o estudu iha Universidade Nasionál Timor Lorosa’e (UNTL), Fakuldade Edukasaun, Arte no Humanidade, Departamentu Matematika, semester VI.

Tuir informasaun, hafoin PNTL halo identifikasaun, familia vitima lori ona vitima ba nia hela fatin iha Fatuhada molok lori ba Aileu hodi haloot.

“Loos duni iha provas hatudu katak durante ne’e Vera la tuir aulas, iha materia disiplina tomak semester 6 nian, nia la tuir ona,” informa Vise Diretór Departamentu Matematika UNTL, Lorenco Aparicio Guterres ba jornál INDEPENDENTE iha nia knar-fatin, Kinta (13/09).

Bainhira Vera la marka prezensa iha aula, nia dehan, dosente sira husu ba ninia kolega atu buka tuir, maibé laiha informasaun.

“Nia kolega sira mós la hetan nia,” Vise ne’e hatete.

“Ami foin hakfodak kuandu haree notisia katak vitima ida mate iha Subaun ki’ik ne’e naran Vera husi Departementu Matematika UNTL,” dehan nia.

Tuir informasaun ne’ebé diariu ne’e hetan, suspeitu na’in haat ne’e deskonfia sona vitima nia kotuk laran, tanba bazeia ba identifikasaun polisia nian identifika katak iha koak ida iha vitima nia kotuk-laran.

Entretantu, ba suspeitu sira ne’ebé hetan ona kapturasaun, Komandante Daruak PNTL Munisipiu Dili, Superintendente Asistente Euclidis Belo hatete, suspeitu na’in haat daudauk ne’e detein iha sela Kaikoli hodi hein prosesu julgamentu.

“Ami detein suspeitu na’in haat tuir pedidiu ne’ebé mak PNSIK husu, tanba (PNSIK) laiha sala detensaun. Maibé prosesu tomak sira mak hatene,” dehan Euclidis.

Iha Tersa (11/09) maizumenus tuku 19:00, Polisia Nasionál Servisu Investigasaun Kriminal (PNSIK) konsege kaptura suspeitu na’in haat ho inisial NX, MXB, JTV, no AJ iha fatin la hanesan, na’in tolu (3) iha area Likintai, suku Lahane Oriental, no na’in ida seluk iha Balide.

Husi suspeitu na’in haat ne’e, na’in ida ho inisial NX no identifika ho kodigu ‘Kota-Lai’ ne’ebé koñese di’ak vitima deskonfia nu’udar autór prinsipal ba kazu ne’e.

Tuir informasaun husi membru polisia ida ne’ebé lakohi públika ninia identidade, hatete vitima mai husi munisipiu Aileu no eskola iha universidade ida iha Dili.

Iha 2 Agostu 2018, vitima ba partisipa iha feira ida ne’ebé loke iha area Likintai. Iha kalan vitima ho suspeitu ko’alia ba malu no desidi atu sees aan hodi buka fatin ne’ebé ema seluk la haree.

Hafoin hakotu-lia, Kota-Lai hahú buka maneira no nia hanoin kona nia kolega ida ne’ebé iha kareta ho xapa matrikula 24-923 TL.

“Kota-Lai husu ba ba karreta nain ne’ebé hamrik hela ho ninia kolega rua katak nia hetan na’an di’ak ida maibé presiza karreta atu tula,” polisia hasaran lia-fuan ne’ebé suspeitu koalia durante interogasaun.

Karreta nain aseita no nia kolega na’in rua seluk mós hakarak tuir. Kota-Lai ho vitima sa’e ba karreta ne’e no sira na’in lima halai ba area Dolog-oan, Kristu Rei.

Iha Dolog-oan, vitima lakohi atu halo relasaun ho ema na’in tolu seluk ne’ebé mai ho sira. Kota-Lai obriga no mosu duni violasaun seksual.

“Liu tiha ida ne’e Kota-Lai sente tauk vitima bele halo keixa. Nia hanoin atu despaixa vitima par halakon tiha evidensia. Kota-Lai dehan sira oho vitima depois mak tula ba so’e iha Subaun,” dehan fonte ne’e.

Maske nune’e, fonte ne’e la esklarese oinsa suspeitu sira oho vitima no hakoi iha Subaun.

Hafoin loron 15, iha 18 Agostu, polisia simu informasaun husi parte kompaña ne’ebé kaer projetu estrada iha area Subaun kona-ba mate-isin ne’ebé sira hetan. PNSIK tuun kedan ba fatin akontesimentu hodi halo identifikasaun.

Evidensia ne’ebé PNSIK rekolla mak xinelus kór cokolate, brinkus modelu kurasaun, no roupa laran kór pink. Fofoun PNSIK hetan difikuldade atu identifika vitima tanba laiha dokumentu ida ne’ebé bele hatudu.

Maibé, liu husi teste DNA no informasaun balun ne’ebé konsege halibur, ikus mai iha duni rezultadu.

Iha 11 Setembru kalan, polisia konsege kaptura suspeitu na’in tolu no daudauk ne’e detein iha sela Komando Polisia Munisipiu Dili.