Prokuradór Jerál Repúbika (PJR) José da Costa Ximenes informa katak, suspeitu kazu konflitu entre elementu artemarsiais sira iha Munisipiu Bakau tama ona prizaun preventiva, no suspeitu ba kazu hanesan iha Munisipiu Dili no Likisa iha hela prosesu investigasaun nia laran.
“Situasaun atual liu-liu konflitu entre elementu arte marsiais ne’ebé akontese iha Baukau, Dili no Likisa Ministériu Públiku (MP) servisu hamutuk ho Polisia Nasionál Timor Leste (PNTL) konsege aprezenta ema balun ba Tribunál no aplika ona medidas koasaun ka prizaun preventiva ba kazu balun ne’ebé akontese iha Mulia, Baukau ne’ebé ataka malu to’o sunu uma ida,” informa PJR José ba jornalista sira hafoin enkontru semanál ho Prezidente Repúblika Fransico Guterres Lu Olo iha Palasiu Prezidensiál Bairu-Pite, Tersa (12/02).
Entretantu, iha fulan Janeiru nia laran mosu konfrontu entre grupu artemarsiais iha Munisipiu Bakau.
Tuir informasaun husi Komando Polisia Nasionál Timor Leste (PNTL) Munisipiu Baukau iha konfrontu entre grupu artemarsiais ne’e rezulta ema na’in haat hetan kanek no uma tolu mak hetan sunu.
Komandante Daruak PNTL Munisipiu Baukau, Superintendente Asistente Jony Viana informa, konfrontu refere komete husi grupu artemarsiais PSHT ho Kera Sakti husi knua Dewake, Wairage, no Bahu.
Iha konfrontu ne’e, suspeitu sira uza kilat manu no rama ambon hodi tiru ema na’in haat. Na’in tolu hetan tiru ho kilat manu iha rentos, kotuk laran, no kabun, enkuantu na’in ida seluk hetan hana iha kanotak.
Komando PNTL Baukau la informa identidade vitima na’in haat ne’ebé kanek, maibé hatete de’it katak daudauk ne’e sira detein ona suspeitu na’in ida ho inisial JM (23) iha sela Polisia Baukau.
“Ami kaptura kedas suspeitu depois akontese kazu ne’e iha Kuarta (09/01) maizumenus tuku 12:00 meudia,” informa Komandante Jony Viana iha Riamare Munisipiu Bakau, Kinta (10/01).
Tuir infromasaun, deskonfia grupu artemarsiais husi Wairage mak trasa planu hodi halo ataka ba grupu artemarsiais iha Bahu.
Komandante Jony hatete tan, hafoin akontesimentu PNTL ho F-FDTL tuun kedan ba fatin akontesimentu no konsege lori vitima na’in haat ba halo tratamentu iha ospital Baukau.
“Sira na’in tolu hetan tiru ho kilat manu iha rentos, kotuk laran, no kabun, ida seluk hetan hana ho rama ambon iha kanotak,” dehan nia.
